電影LOL︳《雷神4》預告片登場 Natalie Portman變女雷神勁大隻 仲有銀河守護隊出場!

·2 分鐘文章

緊接5月《奇異博士2》,Marvel將於7月推出《雷神奇俠4:愛與雷霆》,MCU一反常態,拖到依家終於肯出首條預告片!

《雷神》系列頭2集,無論評價同票房都麻麻,男主角Chris Hemsworth大隻靚仔,不過劇情空洞無咩發揮,被Tom Hiddleston 飾演嘅Loki搶哂風頭。直至Taika Waititi接手執導第3集先有返靈魂,將fit爆雷神變成頹廢肥兼有啲傻氣,結果人氣飆升,《雷3》票房評價非常理想!

首支先導預告片雖然只得短短分幾鐘,已經透露唔少劇情同笑位!《雷4》故事緊接《復仇者聯盟4》,片段一開就見「雷神」操緊身,終於回復fit爆body,周游列國嘅佢仲熱吻藍髮女士,似乎過得好疏肝,自信嘅佢都有唔少中二行為,懶型咁除褸結果掟中同行嘅「星爵」(Chris Pratt飾)!

預告片見到「銀河守護隊」同雷神結伴同行,不過戲份唔似吃重,主要安排「星爵」翻白眼同串雷神,兼加啲BL元素!其中一幕「星爵」對隊員講「望住愛人對眼」(look into the eyes of the people you love)時得到「雷神」痴漢式凝視!呢個shot夠哂爆,twitter已經有唔少fans幫手接龍設計談情對白!

不過最爆一定係再次回歸系列嘅Natalie Portman,自2019年Comic Con記招公佈佢飾演嘅Jane Foster將以「女雷神」(Mighty Thor)回歸後就無咩消息。Natalie Portman一向以玉女形象示人,就算做「女雷神」都無預佢變身動作巨星,頂多好似其他Marvel電影女英雄接受體能訓練修下線條,點知佢竟然操到勁大隻,隻二頭肌拍得住Chris Hemsworth!

導演Waititi喺社交媒體先後2次出post宣傳,講笑話電影上映期1986年7月,又話睇完預告片等如睇哂《雷4》!明明預告片仲未見由Christian Bale飾演大反派Gorr出現,好想知雷神點樣用愛與雷霆對付Gorr囉!

更多電影文章

電影LOL︳戲院下周重開 《蝙蝠俠》終於有得睇 《梅艷芳》再上映

電影LOL︳《婚前昏後》荷里活青春版?肥Amy Rebel Wilson新片Senior Year演昏迷廿年超齡高中生

電影LOL︳《超音鼠2》開畫大賣 導演有意拍對家任天堂全明星game大電影

電影LOL︳又有佢份?尼古拉斯基治親認拍《奪面雙雄》續集

電影LOL︳禁錮一年變情侶 Netflix爭議之作365 Days拍續集 預告片曝光更多火辣床戲

電影LOL︳被爆迫女星上床換演出機會 日本導演園子溫寫信道歉

電影LOL︳《魔比剎》導演爆料 謝拉列圖投入殘障角色 去廁所都扶拐杖

按此下載 全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能