雅虎香港新聞 電影LOL︳外國00後著西裝去睇《迷你兵團2》成風潮甚至被禁入場 背後原因唔止為咗呃like
《迷你兵團2》可以話係呢期最爆電影，美國國慶長週末一共收1億2500萬美元，打破歷年國慶檔紀錄。唔止咁，最近歐美地區仲出現GentleMinions嘅風潮。有年青觀眾為咗隆重其事，同班friend著晒西裝去戲院睇《迷你兵團2》，仲拍片放上社交平台，點知大受歡迎，喺TikTok有數以百萬計嘅收看次數，亦令唔少後生跟住做。而家#GentleMinions已經成為睇戲新玩法，亦令到戲院生意更加好，就連《迷》片商環球都出post多謝大家。
to everyone showing up to @Minions in suits: we see you and we love you. 🫶
— Universal Pictures (@UniversalPics) July 1, 2022
至於點解要著西裝？放心，冇劇透，因為同劇情無關。外媒Variety訪問咗頭一批玩#GentleMinions嘅年青人，佢話同佢年齡相若十零廿歲嘅一代，真係睇《壞蛋獎門人》系列成長。今次係相隔5年再見到犀利哥同迷你兵團，而家佢地大個仔又有少少錢，就想用自己方法去懷緬下。又係噃！《壞蛋獎門人》2010年上畫，假如當時入場睇嘅小朋友係7歲，而家都19啦！確實係最肯參與同會拍片放上網share嘅年紀。
不過因為一班後生睇得太興奮，行為過火少少又嘈咗少少，有戲院收到其他觀眾投訴而要退款。英國更有院商表明，如果觀眾三五成群著晒老西去睇《迷你兵團2》，院方會唔俾佢地入場。
呢個熱潮玩到幾耐冇人知，但係年青一輩仲會享受去戲院睇戲，電影業界應該唔怕要同串流平台打過。BTW，十幾歲仔就要懷緬過去，會唔會早咗少少？
更多電影文章
電影LOL︳今期睇咩戲 迷你兵團2／漫畫殺人狂／孤傭兵／焚身／前科者
電影LOL︳上半年最高票房5大港產片 全部收唔過100萬 《壯志凌雲︰獨行俠》8545萬封外語片王
電影LOL︳《迷你兵團2》打破美國國慶長周末票房紀錄 疫後電影市道反彈
電影LOL︳傳迪士尼出天價3億美元邀再拍《魔盜王》 Johnny Depp回應︰假嘅！
電影LOL︳股價今年跌7成 訂戶流失20萬 NETFLIX大裁員怒炒450人
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
