雅虎香港新聞 電影LOL︳兩大荷里活人氣王 美國隊長Chris Evans拍The Rock演新片 等做佳節檔期票房冠軍
「美國隊長」Chris Evans卸下戰袍後非常忙碌，密密有新搞作！排住隊有羅素兄弟執導、夥拍「邦女郎」Ana De Armas主演動作大片《The Gray Man》，又會於Pixar新片Lightyear中聲演巴斯光年，之後仲會監製荷里活歌舞片傳奇演員真基利傳記電影。當大家仲估估下佢會唔會親自上陣飾演真基利，外媒Deadline報導Chris又有新戲拍！
今次Chris Evans將會夥拍大隻佬The Rock Dwayne Johnson首次合作，齊齊主演年尾假期檔動作喜劇Red One。北美地區11月中至12月底橫跨感恩節及聖誕節2個大節日，屬票房旺期，又有啲似我哋嘅賀歲檔，例牌會有喜劇、溫馨嘅合家歡電影上映！
Red One由Amazon Studios出品，《逃出魔幻紀》系列導演Jake Kasdan執導、《狂野時速：雙雄聯盟》《狂野時速》系列編劇Chris Morgan執筆劇本創作，電影暫時未公佈故事大綱，不過希望打造出集歷險、動作及喜劇於一身，開拓新嘅聖誕應節電影類型！
Dwayne Johnson加Kasdan及Morgan呢個台前幕後組合已多次創下高票房紀錄，《逃出魔幻紀》系列全球共收咗17億美金票房，《狂野時速》系列條數仲驚人！Dwayne Johnson形象超好，好到美國有人聯署叫佢選總統，無論大人細路都鐘意佢，今次加埋形象一樣咁好嘅Chris Evans，如此台前幕後陣容，應該稱霸聖誕檔無難度！
Red One預定今年開鏡，2023年年底上映。Chris Evans個片期密密麻麻，仲有無時間做真基利又唱又跳呢？
更多電影文章
電影LOL︳邦女郎 Ana 舊作被cut戲 Fans為4蚊告Amazon索償500萬 導演解釋︰觀眾唔buy
電影LOL︳《盜火線》終於有續集 小說8月有得睇 隨時拍成電影網劇
電影LOL︳電影評論學會大獎《智齒》《殺出個黃昏》成大贏家 年度推薦片單多達十套創近年新高
電影LOL︳花姐都話正 台灣男神許光漢 新片有齊BL鬼怪推理喜劇元素
電影LOL︳X! 荷里活新勢力A24最新恐怖片 後生仔拍4仔變血腥大屠殺
電影LOL︳巨星班底轉人腳？「對稱大師」Wes Anderson搵男神Benedict拍新片
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載
