雅虎香港新聞 電影LOL︳同Joaquin Phoenix愛到喪心病狂 Lady Gaga演新版小丑女劇照曝光
華納高層換血之後，DC電影計劃一齊大執位，最慘應該係飾演「超人」嘅Henry Cavill，明明喺《黑亞當》中驚鴻一瞥以為正式回歸，仲辭演埋《獵魔士》，點知新老細James Gunn另有打算，始終無緣再披超人斗篷！
不過大刀闊斧改革嘅只限DC電影宇宙，行暗黑系嘅副線DC Elseworlds 似乎無咩受影響。之前叫好叫座又攞獎嘅《Joker小丑》續集繼續進行。今集故事聚焦「小丑」與Harley Quinn喺精神病院（Arkham Asylum)相遇、相知再相戀嘅故事。有跟開「小丑女」都知佢本身喺心理醫生，因為同「小丑」治療，結果自己都癲埋先成為又喪又狂嘅「小丑女」！
今次片名叫多咗句法文Joker: Folie à deux非常貼題，因為Folie意指精神病、 à指傳染，而 deux係兩個人嘅意思，大意指兩人接受、支持對方嘅妄想咁解，即係「神經俠侶」？
Margot Robbie嘅「小丑女」本來只係《自殺特攻》嘅其中一員，不過其演繹太出眾，結果《自》重啟得佢有得留低，仲有埋個人電影《猛禽暴隊：解瘋小丑女》，成功晉身為DC電影主角！不過今次同影帝Joaquin Phoenix「小丑」愛狠糾結嘅唔係Robbie，而係Lady Gaga!
今日導演Todd Phillips 就喺自己ig放出首張Lady Gaga演小丑女嘅劇照，祝大家情人節快樂！相中可見Gaga同Phoenix四目對投，女嘅望到眼都突埋，男嘅眼神一片溫柔，加上一面血，確實似愛得瘋狂！
Margot Robbie早前接受訪問時表示，好開心Lady Gaga接手「小丑女」，並相信佢會演得出色。Lady Gaga音樂才華備受肯定，演戲作品有限，今次喺Joker: Folie à deux對住影帝有咩發揮，相信觀眾都相當好奇。電影暫定於2024年10月上映。
更多電影文章
電影LOL︳想見你 ／ 流浪地球2／TÁR ／ 花路阿朱媽 ／ 輝夜姬想讓人告白－永不結束的初吻
電影LOL︳「趙喜娜」全面進場？John Cena黑絲短裙look拍新戲
電影LOL︳NFL 超級碗廣告黃金時段 《銀河守護隊3》《狂野時速10》《閃電俠》重本公開大片預告
第41屆香港電影金像獎提名名單 《正義迴廊》16項提名 呂爵安柳應廷爭新演員獎獨欠姜濤
電影LOL︳Marvel《神奇四俠》落實開工日期 主角人選今年揭曉
電影LOL︳《奪命狂呼》翻炒收得 輪到《舊年暑假搞乜鬼》拍新版
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
