電影LOL︳奧斯卡男角獎項預測 《王者世家》韋史密夫有望做影帝 男配角爭崩頭

最佳男主角提名名單：

哈維亞巴頓《成為里卡多之路》

班尼狄甘巴貝治《犬山記》

安德魯加菲《夢想期限tick, tick...BOOM!》

韋史密夫《王者世家》

丹素華盛頓《馬克白》

睇牌面睇表現，今屆影帝好似幾勢均力敵︰拎過奧斯卡嘅哈維亞巴頓同丹素華盛頓，金球獎2位影帝韋史密夫及安德魯加菲雙雙入圍，加埋向來公認好戲嘅Benedict，睇落個個都有機會。

不過！《成為里卡多之路》重戲份嘅係女主角Nicole Kidman，哈維亞巴頓當堂成為陪跑份子；《馬克白》絕對係演員最想演嘅劇本之一，以丹素華盛頓嘅實力亦駕馭得來，視覺上套戲係有型有新意，但爭獎方面冇咩聲勢；上代「蜘蛛仔」演命途多舛嘅音樂劇創作人Jonathan Larson，演戲彈琴唱跳樣樣有，但奧斯卡有幾buy音樂劇電影？

所以真係有贏面嘅只有Benedict同韋史密夫。Benedict破格演繹美國南方粗魯牛仔，聽落幾有《斷背山》味道，《犬山記》之前多個頒獎禮拎過唔少獎，但係Benedict 多數有提名冇獎拎。至於韋史密夫接拍《王者世家》嘅目標好明顯︰做影帝。人物傳記，仲要係黑人網球天后威廉斯姊妹嘅老豆，2大近年中獎元素齊晒。而且，《犬山記》係Netflix出品，《王者世家》係片廠華納嘅，以奧斯卡仲有唔少評審都係偏好傳統電影模式嘅取態，Will Smith封帝機會稍為高。

最佳男配角提名名單：

Ciarán Hinds《Belfast》

Troy Kotsur《心之旋律》

Jesse Plemons《犬山記》

J. K. Simmons《成為里卡多之路》

Kodi Smit-McPhee《犬山記》

先剔除2位︰同屬《犬山記》，但影評焦點多數放喺Kodi Smit-McPhee，唔好意思嘞Jesse Plemons；再講多次 － 《成為里卡多之路》重戲份嘅係女主角Nicole Kidman，拎過最佳男配角嘅J. K. Simmons都唔太介意未能錦上添花嘅（我估）。

其餘3位就真係爭崩頭，舞台劇演員Ciarán Hinds喺Belfast展現多年功駕，加上電影係片廠出品，當堂睇高一線；25歲嘅Kodi Smit-McPhee喺3個前輩面前不落下風，有細眉細眼嘅情感流動，絕對有眼前一亮嘅感覺，亦已經贏得金球獎最佳男配角。至於Troy Kotsur近期喺演員工會大獎、影評人大獎同英國電影學院頒獎禮連奪3獎，可謂氣勢如虹，一定可以喺近期先投票嘅金像獎有明顯優勢。假如Troy Kotsur得獎，佢將會成為首位獲獎聽障男演員，好配合近年鼓吹平等大愛多元嘅賽果。

更多電影文章

電影LOL︳《高校18禁》人氣34D索女Sydney Sweeney加盟Marvel外傳電影《蜘蛛夫人》

電影LOL︳張家輝終於有新片 《新秩序》導演係《掃毒》古惑仔

電影LOL︳發夢靚妹變超級英雌 新劇Ms. Marvel預告片登場 6月Disney+上架

電影LOL︳Anson Lo盧瀚霆拍英國導演新片 夥日泰韓星卡士重慶大廈打喪屍

電影LOL︳古天樂監製《一家人大戰機械人》揚威動畫頒獎禮 大有機會拎埋奧斯卡？

電影LOL︳傳明珠台連續2年唔播奧斯卡 大會批准外地參加者免隔離

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載