電影LOL︳業界大事CinemaCon 迪士尼高層爆粗讚《死侍》贏盡掌聲

專為北美戲院業界人士而設嘅商貿活動CinemaCon剛剛完結，有唔少片商都趁機介紹旗下即將上映新片 － 話晒而家仲有唔少人入戲院睇戲，而一套戲有冇得到戲院好嘅排片安排，都足以影響票房，所以片商要靠宣傳吸引觀眾之外，梗係要sell到院商套戲有數返先得啦。

喺CinemaCon最後一日，迪士尼出大絕，結果令外媒認為係CinemaCon咁多個新片介紹活動之中做得最有聲有色！首先係搵大隻佬The Rock（Dwayne Johnson)驚喜現身，宣傳11月底上映嘅《魔海奇緣2》。來自夏威夷嘅The Rock，繼續為呢套以夏威夷作故事背景嘅動畫配音，而真人版《魔海奇緣》電影都會由The Rock主演。今次現身撐場，好合理。

「迪記」另一個話題舉動係喺介紹《死侍與狼人》(Deadpool & Wolverine)嘅時候，瘋狂爆粗！先有一段小劇場，搵演員扮死侍同狼人，然後用盡F WORD鬧爆觀眾唔熄電話。而Marvel老細Kevin Feige出場介紹新片時，亦都話《死侍與狼人》好x正。需知道呢個都係業界活動，主要傾生意嘅，好少可有老細上台爆粗，但係Kevin Feige話《死》會係R級片(大約係香港IIB級），用粗口sell戲好啱數。據Hollywood Reporter報導，《死侍與狼人》播放嘅優先觀賞片段，係喺CinemaCon宣傳嘅咁多套新片之中，最多笑聲同掌聲！

此外，迪士尼仲喺CinemaCon推出另一大片《獅子王：木法沙》嘅預告。2019年嘅「真獅版」《獅子王》電影大收17億美元，成為迪士尼史上最高票房電影，今集當然不容有失。奧斯卡最佳電影《月亮喜歡藍》導演Barry Jenkins，而今集故事以獅子王主角仙巴爸爸木法沙成為王者嘅故事。另外，迪士尼亦都俾戲院界人士率先睇《玩轉腦朋友2》同《猿人爭霸戰：猩凶帝國》片段。出力到咁，舊年失落全球票房冠軍嘅迪士尼，似乎今年要爆啦。

更多電影文章

電影LOL 今期睇咩戲︳但願人長久／破墓／美帝崩裂／排球少年!!垃圾場的決戰

電影LOL︳《BJ單身日記》宣布拍第4集明年情人節上映 當年講溝仔而家講湊仔？

電影LOL︳Zendaya大讚新片床戲有「動作指導」呢份工原來要做呢啲嘢

電影LOL︳《斷背山》失落奧斯卡最佳電影 李安歸咎評審歧視同志片

電影LOL︳吳彥祖加盟關繼威主演新片With Love 一齊打打打

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！