電影LOL︳貓王傳記片打破家屬例必唔撐定律 男主角入戲太深拍完入醫院

年年都有人物傳記片跑出,好似近期Netflix嘅《孟買月帝》又或者上年票房理想嘅《梅艷芳》,傳奇人物生活高低起伏深受觀眾歡迎。不過銀幕下經常爭議不斷,最常見一定係名人家屬不滿電影情節,又或者嬲電影公司無問佢意見又唔俾顧問費,不停同傳媒大呻電影失實!

傳記片最高成就應該係得到名人親朋好友認同,《大亨小傳》導演巴茲雷曼新作《貓王》可以話係成就解鎖,得到「貓王」前妻Priscilla Presely 及女兒Lisa Marie Presely嘅認可,獲兩人於社交媒體出post力讚,Priscilla更特別同劇組出席康城電影節首映禮以示支持。

《貓王》於康城獲得高度評價,映後獲全場12分鐘起立致敬,搞到導演同男主角Austin Butler眼濕濕。電影講述貓王由籍籍無名鄉村男孩,搖身一變成為叱吒風雲的搖滾之王嘅精彩一生。由他站上舞台那刻展開。貓王被經理人Tom Parker上校(湯漢斯)發崛,助他走上國際巨星之路。

男主角Austin Butler「貓王」之路一啲都唔易行,Harry Style、《西城故事》男主角Ansel Elgort同《壯志凌雲:獨行俠》男星Miles Teller等男星,都有份競逐「貓王」一角。Austin係幾位當中知名度最低,外型又最唔似嘅一位,連導演巴茲雷曼都話,當初收到佢條喊住唱Unchained Melody 嘅試鏡片段,睇到莫名奇妙,諗緊佢玩嘢定認真!

後來多得Denzel Washington一個電話力薦,先改變導演諗法,決定俾多次機會Austin試鏡,先有今日嘅《貓王》。Denzel Washington同Austin合演過舞台劇,被Austin認真又用心嘅工作態度打動,連影帝都忍唔住cold call幫手做說客,可見Austin有幾努力。

Austin Butler呢2年一心一意為《貓王》做準備,睇嘅聽嘅全部都係貓王相關,投入到把聲同口音都變埋,導演都分唔清佢做緊戲同定做緊自己!可能太投入角色,套戲一煞科,Austin即刻大病入院住咗成個禮拜,佢坦承自己抽離唔到角色變得迷失,好彩得到同戲另一男主角影帝湯漢斯提點,先抽離到!

努力有回報,Austin嘅演出普遍好評,外型唔似但熱情搭夠,連「貓王」女兒Lisa都大讚佢值得擁有奧斯卡小金人,單係呢個好評已經無價。

更多電影文章

電影LOL.今期睇咩戲︳壯志凌雲:獨行俠/犯罪都市:極拳執法/不要忘記我愛你/總理之夫/壞蛋聯盟

電影LOL︳IU做媽媽 日本導演是枝裕和拍韓片《孩子轉運站》 棄嬰收集箱引發的人情故事

電影LOL︳好笑得嚟幾得人驚 《雷神奇俠4:愛與雷霆》預告片出爐

電影LOL︳情色經典《艾曼紐》拍新版 邦女郎Léa Seydoux挑戰大膽性愛場面

電影LOL︳又係Margot Robbie! 《盜海豪情》新篇又有「小丑女」

電影LOL︳居然係律師喜劇?《變形俠醫》分支劇She-Hulk預告曝光

按此下載 全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能