雅虎香港新聞 電影LOL︳阿媽爭人錢走佬 新片Quiz Lady反差姊妹花玩問答遊戲上電視跑數
劉德華獲第48屆多倫多國際電影節(TIFF)頒發「特別頁獻獎」，佢今次除咗領獎之外，仲聯同寧浩導演帶住新作《紅毯先生》作全球首映。華仔去領獎令TIFF更受港人留意，而今年多倫多參展電影眾多，其中一部由虞琳敏（Jessica Yu）執導，由吳珊卓（Sandra Oh）及Awkwafina主演嘅喜劇電影Quiz Lady相當受關注。電影講述2位關係疏離嘅姊妹，因為母親欠下巨額賭債，為咗跑數而走上瘋狂搵錢之旅！
Sandra Oh今次飾演中年依然發緊明星夢、非常唔可靠、行事衝動嘅家姐Jenny。為配合角色，Sandra Oh少有地化行妝、Set哂大波浪頭仲夾住紫色假髮兼著住一係透視一係開窿嘅衫，從影多年鮮有咁搶眼嘅造型。而做佢個妹嘅Awkwafina今次做宅女Anna，戲中嘅佢因為父母離異後自我封閉，唔同人有任何交往，日日同隻狗意粉（Mr. Linguini)宅喺屋企，唯一嗜好係睇遊戲節目Can’t Stop the Quiz。
本來一家人老死不相往來，不過因為佢哋阿媽Crystal欠債唔還錢仲著草，搞到債主上門仲綁架咗意粉，Anna無奈之下唯有搵家姐Jenny幫忙，最有機會搵錢還債方法就係上Can’t Stop the Quiz贏獎金！Jenny想成名不過無腦、Anna識答題成本百科全書咁不過社恐，單係報名、參加海選已經掙扎不斷。慘烈混亂得嚟，又幾好笑。
Jenny同Anna最後成功上到節目，Anna終於親身見到佢偶像、由Will Ferrell飾演嘅節目主持人Terry McTeer。故事有轉折，上電視只為姊妹重修舊好，最終大團圓結局。經常喺「對稱大師」Wes Anderson作品亮相嘅Jason Schwartzman亦有客串，於Quiz Lady飾演乞人憎Can’t Stop the Quiz台主！電影11月3日會直上北美Disney旗下串流平台Hulu，有興趣嘅香港觀眾不妨留意下。
更多電影文章
電影LOL 今期睇咩戲︳威尼斯謀殺案／七月返歸／說笑之人／手靈／愛很自私／東京復仇者2血腥萬聖節篇-命運
電影LOL︳拍完5年 12月終上映 錢國偉遺作《熱血燃燒》齊集古惑仔4主角獨欠鄭伊健
電影LOL︳《水行俠》續集宣傳啟動 Elon Musk分享舊愛Amber Heard 私照幫手做勢？
電影LOL︳姜濤台灣宣傳《我的天堂城市》 姜糖逼爆西門町 獻螢幕初吻強調有漱口
電影LOL︳《復仇者聯盟6》導演人選3大熱門 有2個拍過Marvel作品 另一位同超級英雄片大纜扯唔埋？
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
