雅虎香港新聞 電影LOL︳《復仇者聯盟6》導演人選3大熱門 有2個拍過Marvel作品 另一位同超級英雄片大纜扯唔埋？
漫威電影宇宙吸金能力遞減，新一代超級英雄談論度，無論喺劇集及電影方面都不慍不火，不過大IP再平淡都有錢賺，所以漫威無因為票房平平而減慢推出新超級英雄系列，元老級人馬唔齊腳？一樣可以拍《復仇者聯盟6》！
《復仇者聯盟6》（Avengers：Secret Wars）未有故事大綱，連背景設喺邊個階段都未知。根據美國電影資料庫IMDB，《復6》將有「雷神」Chris Hemsworth、「變形俠醫」Mark Ruffalo、「奇異博士」Benedict Cumberbatch、「尚氣」劉思慕、「Ms Marvel」Iman Vellani、蟻俠個女Cassie Kathryn Newton等人主演，相信又會用幾套劇同戲舖陳，最後扭埋一齊成為《復6》！
扭戲軌之前要搵個創作大腦，現階段最重要係物色導演人選，而暫時傳聞執導人選有3位，位位都係大導！第一位係執導過幾部「蜘蛛俠」及《奇異博士2: 失控多元宇宙》嘅Sam Raimi。Raimi對「蜘蛛俠」非常熟悉又拍得好睇，不過佢拍「奇異博士」又效果一般，跑出成數都係一般。
第2位傳聞大熱導演係《死侍》Shawn Levy。佢成功將無人識嘅「死侍」變成受歡迎IP，証明有諗頭夠大膽，加上《復6》故事又會錯綜複雜、幾個宇宙穿插，搵佢拍可以考慮插埋「死侍」條線落埋漫威大家庭！有外媒向Levy求証有關傳聞，而佢把口非常實，咩都無透露。越唔講等越有景轟，可能真係同漫威傾緊喎！
而最後一位就係憑《羅馬》及《引力邊緣》撗掃奧斯卡多個大獎嘅艾方索柯朗（Alfonso Cuaron）。如果成事，相信Cuaron會為漫威拍出不一樣嘅《復6》。雖然聽落驚喜不過網友就覺得成數唔大，因為「復仇者聯盟」等超級英雄題材，唔似Cuaron杯茶。而且以佢鍍金攞電影大獎嘅能力，要搵資金拍自己鍾愛嘅題材毫無難度，漫威張巨型支票對佢唔一定有吸引力。
《復6》受荷里活工潮影響應該有排都未開拍，仲有大把時間搵導演，最後花落誰家可能要開戲嗰時先知。
更多電影文章
電影LOL 今期睇咩戲︳詭修女II／殺出坎大哈／女子監獄／救參的士／銀河鐵道之父
電影LOL︳千禧童界潮片《非常小特務》23年後再有續集 今次又要細路救邊個？
電影LOL︳The Rock 10年前舊作《毒火線》 點解忽然打入Netflix收視十大
電影LOL︳鯊魚咬人係收視保證？新片The Black Demon成Amazon Prime最受歡迎節目
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
