雅虎香港新聞 電影LOL︳千禧童界潮片《非常小特務》23年後再有續集 今次又要細路救邊個？
荷里活編劇及演員工潮仍未結束，想睇全新創作可能要等下。不過就算無工潮，荷里活早已翻拍成風，由Netflix重啟嘅2000年代合家歡電影《非常小特務》，最新一集Spy Kids Armageddon將於9月22日平台上映。
《非常小特務》講述特務一家嘅故事。活潑可愛、古靈精怪嘅姊弟Carmen同Juni被壞人捉走作人質，企圖要脅佢哋嘅特工父母Gregorio 及Ingrid，點知兩位細路一身好武功仲識用高科技，對付壞人游刃有餘，最後聯同父母一家四口捉拿壞人，齊齊立功！
電影難得以小朋友為主，仲要咁打得，當然大受歡迎。飾演小特務嘅Alexa PenaVega同Daryl Sabara成為童界偶像，接連主演系列第2及第3集，後來相信因為已經長大唔再細路樣，2011年第4集改由其他小演員主演，而特務父母亦由原先嘅「西班牙影帝」Antonio Banderas及Carla Gugino，變成《大熊餐廳》嘅Joel McHale及Jessica Alba飾演！
系列當年都算大製作，有唔少巨星參演，包括《索女．重炮．神經刀》嘅Danny Trejo、《大愛同行》Alan Cumming 、Salma Hayek同動作巨星史泰龍！
《非常小特務》事隔12年再由Netflix重啟，要幕前原班人馬回歸，就一定無可能同無必要。不過創作大腦、系列導演及編劇Robert Rodriguez就鐵定會回歸執導新版「小特務」Spy Kids Armageddon，而小特務則由Everly Carganilla及Connor Esterson飾演，特務父母則由《沙贊！眾神之怒》嘅Zachary Levi及美劇Jane the Virgin女主角Gina Rodriguez主演。
電影近日推出預告片，可見Spy Kids Armageddon延續2011年《非常小特務3-D 立體出擊》特色，今集故事將講述小特務被委派拯救遊戲開發公司，制止黑客入侵控制世界嘅陰謀，好有打機Feel！
更多電影文章
電影LOL︳The Rock 10年前舊作《毒火線》 點解忽然打入Netflix收視十大
電影LOL︳鯊魚咬人係收視保證？新片The Black Demon成Amazon Prime最受歡迎節目
電影LOL︳盛傳《闔家辣》開續集搶賀歲檔 呂爵安 吳君如 鄭中基 梁詠琪加古天樂復刻《嚦咕嚦咕新年財》？
電影LOL︳搵老友記扮超能戰隊 《邀阿公阿嬤拍B級殭屍片》紀錄過程好笑又催淚
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
