電影LOL︳鯊魚咬人係收視保證？新片The Black Demon成Amazon Prime最受歡迎節目

以兇悍鯊魚同人類對抗嘅電影，隔一排就有一套半套，但係原來觀眾都幾buy。早排先有《極悍巨鯊2：深溝》(Meg 2)，而呢期串流平台Amazon Prime亦推出一套人鯊大戰新片The Black Demon，本來只係小本製作仲宣傳欠奉，但喺美國收視竟然連奪7日冠軍﹐打低影集The Summer I Turned Pretty 第2季，同埋話題BL新片Red, White & Royal Blue！

故事係講石油大亨一家四口去墨西哥度假，仲坐船出海想登上自己公司個鑽油台﹐點知上面竟然得返幾個人。原來海中有條怪物級巨鯊襲擊鑽油台，而大亨出海隻船已經被鯊魚打沉，要逃出生天可能要有人犧牲……

The Black Demon喺影評網爛蕃茄得分唔高，得31％，算係爛。但觀眾反應就十分受落，8成人俾正評！套戲爆出，監製認為鯊魚片大家睇得多，但片中加入拉丁民間傳說同文化色彩嘅就相當少見。查實美國有近2成人口都係拉丁美裔，佢地相當熱愛睇戲，相信唔少拉丁美觀眾都對The Black Demon有興趣，一齊推高收視。

成本只係1千萬美元嘅The Black Demon級數算係幾B級片，但係監製醒，埋單搵到17個單位合資，仲搵到拍過《第一滴血：終極血戰》嘅導演Adrian Grunberg出手，監製話「當你集資嗰陣話俾人聽『係鯊魚片，個導演拍過Rambo』，根本無得輸」。

The Black Demon開機時正值疫情，有時需要停工；加上套戲有小朋友參演，工時唔可以長；仲要搭個2層半樓高嘅鑽油台同整個大水缸拍攝，加加埋埋只係要1千萬，真係抵，所以而家The Black Demon已經著手籌備第2集，本小利大嘛。

更多電影文章

電影LOL 今期睇咩戲︳怨泊／叛諜裁判3：終極一戰／藍色巨星／尋根女團／熱烈／速戰

電影LOL︳搵老友記扮超能戰隊 《邀阿公阿嬤拍B級殭屍片》紀錄過程好笑又催淚

電影LOL︳床戲多是非更多 HBO宣布The Idol一季玩完

電影LOL︳迪士尼籌拍《魔髮奇緣》真人版 傳《奧本海默》小三Florence Pugh演長髮公主

電影LOL︳荷里活演員罷工影響浮現 《沙丘瀚戰2》《哥斯拉對金剛2》延遲至明年上映

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！