雅虎香港新聞 電影LOL︳拍完5年 12月終上映 錢國偉遺作《熱血燃燒》齊集古惑仔4主角獨欠鄭伊健
內地觀眾對港片《古惑仔》相當喜愛，小編N年前試過喺內地被當地人問起「香港是不是有很多古惑仔，每天在打架？」，足證電影有幾深入民心。而幾位古惑仔主角陳小春、謝天華同林曉峰，多年來喺內地都相當吃得開。
再拍《古惑仔》未必合適內地尺度，但集齊人腳都可以開新戲懷吓舊。早喺2017年，電影喺北京舉行發佈會，當時電影以《孤戰》為名，宣布由陳小春、謝天華、林曉峰以及多年冇見嘅朱永棠主演，而導演係同幾位相當老友嘅錢國偉（Wilson）。到2018年3月，《孤戰》喺泰國開鏡，不過套戲拍好之後，因為多番原因，上映檔期一改再改。最大原因當然同疫情有關，到2021年，《孤戰》改名做《熱血燃燒》，亦即係同《古惑仔》其中一首主題曲同名。舊年4月《熱血燃燒》公布過喺6月內地上映，但後來以「疫情反復」等原因宣布改期。到今年7月，《熱血燃燒》再次確認今年12月底喺內地公映。
另一原因相信係導演健康問題，錢國偉導演2019年時被傳身體抱恙，到2020年10月因胰臟癌逝世。而《熱血燃燒》正正係Wilson嘅遺作。
唔可以作奸犯科，4位「古惑佬」變晒做警察，故事講述一支緝毒隊4名成員，喺一次行動中被黑警洩露風聲而遇險，更有人犧牲。事後各人各行各路，但因為得知當年毒品大亨收買嘅黑警仲另有其人，於是再次合作為復仇而戰。
卡士幾乎同《古惑仔》骨幹成員一樣，但係冇咗浩南哥鄭伊健，點都爭咁啲。至於「古惑佬」當差……其實當年《古惑仔》星馬賣埠版，都加插劇情講陳浩南原來係卧底。咁睇的話，《熱血燃燒》成件事觀感當堂fit晒。
更多電影文章
電影LOL 今期睇咩戲︳威尼斯謀殺案／七月返歸／說笑之人／手靈／愛很自私／東京復仇者2血腥萬聖節篇-命運
電影LOL︳《水行俠》續集宣傳啟動 Elon Musk分享舊愛Amber Heard 私照幫手做勢？
電影LOL︳姜濤台灣宣傳《我的天堂城市》 姜糖逼爆西門町 獻螢幕初吻強調有漱口
電影LOL︳《復仇者聯盟6》導演人選3大熱門 有2個拍過Marvel作品 另一位同超級英雄片大纜扯唔埋？
電影LOL︳千禧童界潮片《非常小特務》23年後再有續集 今次又要細路救邊個？
電影LOL︳The Rock 10年前舊作《毒火線》 點解忽然打入Netflix收視十大
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
