雅虎香港新聞 電影LOL︳Karl Lagerfeld傳記片 敲定《魔比煞》謝拉列圖演時裝界老佛爺
荷里活兩大潮流︰翻拍、傳記片。今日開後者。
外媒報導，有片商準備開拍時裝界「老佛爺」Karl Lagerfeld傳記電影。最重要嘅消息梗係 － 到底邊個演老佛爺？除咗羅蘭姐以外我都諗唔到啦（誤 。
結果係由近年以「方法演技」聞名嘅《魔比煞》男主角謝拉列圖（Jared Leto）成功爭取演出Karl Lagerfeld，恭喜晒。咁當然少不免要美言一番，謝拉列圖喺twitter上面出post話老佛爺永遠啟發到佢，而且係個博學者、創造者、領導者同埋善良嘅人。
德國出生嘅Karl Lagerfeld，少年時移居巴黎，二十出頭打滾時裝界，同另一位大師聖羅蘭識於微時，但最後因為「爭仔」等原因成為敵人。Karl Lagerfeld32歲成為Fendi設計總監，然後喺80年代加入瀕臨衰亡嘅Chanel，一手扭轉品牌命運。老佛爺一生仲有唔少juicy事，感情生活當然係其一，而佢為咗著得落Hedi Slimane執掌Dior Homme年代嘅「窄咪咪」西裝，竟然年過60都走去瘋狂減肥，仲一減就減超過90磅！佢亦出名歧視肥人，連Adele都俾佢批評過。咁多話題，又真係幾值得拍套傳記片。
不過而家仲未知，到底呢套傳記片會涵蓋老佛爺邊個人生段落，因為連導演人選都未知！只係知道，老佛爺3位知己都會出任監製，應該會睇實劇本點描寫老佛爺。而家十劃都未有一撇，當然連映期都唔會知。
早排《魔比煞》上架，當時就有爆料者話，謝拉列圖為咗處於魔比煞呢個有殘障角色嘅世界，係連去廁所都要人摻扶，嚴重影響拍攝進度，甚至有傳劇組要俾張電動輪椅佢坐，等謝拉列圖快快手搞掂。而家要演老佛爺，謝拉列圖又會有咩準備？
更多電影文章
電影LOL︳深宵閃避球／幸福入場券／阿姆斯特丹／初戀慢半拍／電影 五等分的新娘／流浪之月／電影版 搖曳露營△
電影LOL︳Will Smith新片12月上映 奧斯卡提唔提名有分歧 評審：唔x投佢！
奧斯卡台上爭取平權遭荷里活排擠 美國原住民演員Sacheen Littlefeather逝世
電影LOL︳國產TOP GUN 王一博主演《長空之王》上畫3日前突然被撤
電影LOL︳尋回香港曾經的美好 張艾嘉21年後再演港產片《燈火闌珊》
電影LOL︳Netflix節目巡禮TUDUM披露 《天才少女福爾摩斯2》 Emily in Paris映期
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
