ANSONBEAN爆肌拍《ONE DANCE》MV 現場變流動健身室 為保靚身材愛上自煮

跳唱歌手ANSONBEAN在新歌《ONE DANCE》MV展示一身弗爆肌肉，為保持最佳狀態，拍攝現場變流動健身室，教練David不但控制他飲食，還帶住健身器材貼身鞭策他。每當導演嗌cut機，即使只有幾分鐘，都要他做掌上壓、sit-up、拉橡皮筋等動作谷肌，ANSONBEAN六舊腹肌可謂「粒粒皆辛苦」。

新歌《ONE DANCE》由ANSONBEAN與女友Jaime聯手作曲、陳詠謙填詞、TonYnoT編曲及周錫漢監製。「呢首歌紀錄我成長過程，其實我好多時候都好困惑、好迷失，唔知點樣對待音樂、Fans、屋企人、身邊人，因為好多嘢都係好新嘅經歷，唔係好識處理。」ANSONBEAN希望找到方法做得更好，新歌就似是在道歉，他說：「希望大家可以原諒我、畀機會我，去接受一個新嘅我！」

因此《ONE DANCE》MV中，出現他過往MV片段，他就以長矛擊破，而赤膊上陣，寓如他赤裸地展示個人感受。ANSONBEAN說：「唔係因為要拍MV、出碟、有project先至去做健身，其實更早之前，我就好想今年要練好身材，盡量食好啲、操練多啲。而為咗呢個MV，兩星期前認真地戒食澱粉質，五日前開始控制水份吸收。無水飲真係好痛苦，所以要珍惜食水！」

「因為食外賣好難跟到我嘅餐單，最近我開始自己煮嘢食，第一次煮嘅時候喺IG開直播，煮到好核突、好恐怖。第二日就問工人姐姐點煮，佢教咗我一啲方法煎雞，問女友點樣爆蒜頭，仲有問媽咪、上網查、fans留言教我，然後我買咗啲工具幫手，容易咗好多。」ANSONBEAN手舞足蹈，似乎烹飪已成為他的新興趣。

除了一身養眼肌肉，ANSONBEAN在妝容亦花了小心思，他說：「由於今次唱片主題是『火』，MV導演William想呼應返，所以要有『曬燶咗』效果，面紅紅和雀斑。另外邀請咗Masa做Movement Director，除咗跳舞，仲根據歌詞微調動作。希望每件事都再做好啲啲，多謝台前幕後一齊砌靚個MV。」