雅虎香港新聞 【電影LOL】Edan@MIRROR首拍賀歲片有勁敵 黃子華拍《飯戲攻心》加入戰團力爭3連霸
近日有幾套值得支持嘅港產片上映，《濁水漂流》、《遺愛》、《手捲煙》，之後仲有《殺出個黃昏》及《媽媽的神奇小子》。不過對於壓力接近爆煲嘅香港觀眾，最想睇一定係港產喜劇，繼吳君如、鄭中基、梁詠琪及Mirror嘅Edan主演《闔家辣》外，嚟緊賀歲檔仲有《飯戲攻心》！
《飯戲攻心》由《逆流大叔》導演陳詠燊執導，有「男神」黃子華、鄧麗欣、張繼聰、王菀之、「大馬女神」林明禎及陳湛文主演。故事圍繞黃子華、張繼聰、陳湛文呢三兄弟，大講家庭關係及感情生活，叫得《飯戲攻心》戲中當然有多場食飯戲份，黃子華於日前舉行嘅記者會表示以往拍親嘅食飯戲都好片面，嬲到要將劇本掉去後巷，今次《飯》劇本寫得非常好，幾場食飯戲各懷陰謀、互攻心計，有追看性亦相當高難度！
鄧麗欣戲中與黃子華、張繼聰2兄弟有三角關係，角色仲非常神經質，笑言《飯》係一套有好多搞笑戲份嘅文藝片。王菀之戲中飾演廚藝高手，同飾演三弟嘅陳湛文有一段姊弟戀。
比起男女感情戲，戲中3兄弟關係似乎仲有趣！「大哥」黃子華同「二哥」張繼聰係異父異母兄弟，戲中嘅爸爸同張繼聰嘅媽媽一齊，生咗「三弟」陳湛文。講開戲中兄弟關係，黃子華笑指「三兄弟咁大個人仲住埋一齊，一定係好窮。要處理兩個細佬感情、事業，好多攻心嘢要做！」。相對「大哥」努力維繫家庭，「二哥」就想搬出去創造自己嘅家庭，「三弟」就好任性，依賴屋企痴飲痴食。
三個性格迥異嘅大男人住埋一齊仲要爭女，難怪一家人食餐飯會變修羅場，預計電影會有大量金句！記者會上黃子華透露令佢印象最深刻對白「相信就係命運，唔信就係緣份」，預告片仲有另一對白「幸福最大嘅障礙，就係對未來有太大嘅期望」，聽落好似幾有道理！
以往黃子華有票房毒藥之名，估唔到近年成為賀歲檔大贏家，2018年主演的《棟篤特工》以4,470萬元票房成為該年華語片票房冠軍。上年自導自演的賀歲片《乜代宗師》，受疫情影響依然以2,945萬元成為年度最高票房華語片。今年再次擔正賀歲片，同另一新晉男神Edan打對台，唔知會否冧莊成為華語片票房3連冠呢？
更多電影文章
【電影LOL】今期睇咩戲 手捲煙／保鑣救殺手2／狂舞紐約 ／ IS殺錄：摩蘇爾戰線 ／ 高凶任務
【電影LOL】傳朴敘俊加入拍新一集《Marvel隊長》演半人半小強Marvel Boy
【電影LOL】香港重口味導演之王 院線搞桂治洪驚世港產爆片選
【電影LOL】驚慄網劇The Swarm 木村拓哉加盟全英語演出
【電影LOL】《狂舞紐約》談情說愛又講多元文化 演員膚色唔夠多元化捱轟
【電影LOL】政府修訂電檢條例配合國安法 敏感政治片上映有難度
【電影LOL】鄭中基0片酬支持《遺愛》紀錄一宗兇案點影響2代人
【電影LOL】MIRROR ERROR仔仔電視攻上大銀幕 Edan呂爵安拍吳君如鄭中基賀歲片
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
