愛回家｜何晉樂演龍家三房兒子Joe惹負評 網民：不如搵C君做好過

TVB處境劇《愛·回家之開心速遞》劇情輕鬆搞笑又溫馨，深得觀眾喜愛。劇集不時有新臉孔加入，除咗為觀眾帶嚟新鮮感之外，同時亦可以給予新人機會。劇情醞釀咗7年幾嘅龍家三房兒子龍舟Joe終於出場，劇組搵嚟參加《聲夢傳奇》出身嘅何晉樂（Rock）飾演，不過唔少網民都表示對造型失望，而Rock嘅演技亦備受批評。

龍家三房兒子龍舟Joe終於喺前日（12日）一集《愛·回家》登場！劇情講到三太（樊亦敏飾）不慎牽涉入投資騙局，唔少「槍幣」苦主向三太追討賠償。而接龍集團就出聲明，稱龍家眾人與騙案無關，不過文中就冇提及三太，所以三太擔心大龍生（羅樂林飾）要同佢撇清關係。喺開記者會當日Joe突然出現，令大龍生維護三太，成功將局面扭轉。去到噚晚（13日）嗰集，劇情就講到三太希望Joe可以出任接龍嘅管理層人員，不過Joe就表示自己想由低做起，而大小姐（林淑敏飾）就提出Joe到財務部幫手，其實係部署準備對付佢，以為Joe會頂唔順，不過佢就同財務部嘅同事玩得好開心。

Joe嘅出現隨即引起網民熱烈討論，雖然有網民期待佢同劇中演員有火花及覺得何晉樂有喜感，不過大部分網民都對何晉樂飾演嘅Joe給予負評，例如「破壞左咁耐以黎嘅鋪層」、「呀joe鋪排咁耐搵佢黎做真係浪費晒」、「橫掂咁嘅造型，不如揾c君做好過」、「男版菜肉餃」、「樣子怪，又不正氣，那有一點太子風範？」、「TVB完全不考慮觀眾感受」、「真的。有點失望」、「反差實在太大， 罷看。」、「我期待了什么？等了那麼久，居然是這個樣子」、「這個Joe很失望」、「傻下傻下咁，真係睇唔落」、「三太咁靚 上（想）佢有個靚仔仔」、「三太那麼漂亮。。怎麼可能會生出。。。」及「感覺演技好差，眼神有點猥瑣刻意」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！