繁花｜TVB將播映王家衛首部執導兼監製電視劇 被指係年度必追劇？

由王家衛執導及擔任監製嘅第一部電視劇《繁花》去年底於內地播出，好評滿滿，豆瓣評分持續高開8.7分，亦喺短短半年內橫掃唔少頒獎典禮獎項，被譽為「2024年必追陸劇」。《繁花》即將於6月3日起逢周一至周五晚上九點半翡翠台播映，翡翠台成為內地以外全球地區首播嘅電視台。王家衛曾多次勇奪香港電影金像獎殊榮，亦憑《春光乍洩》成為香港首位康城最佳導演得主，但其實佢係透過1980年TVB第一期編導人員訓練班出身，曾擔任TVB劇集《輪流傳》助理編導，及不具名參與《執到寶》、《神女有心》等劇集製作，因此首部執導電視劇安排於TVB播映甚有意義。

《繁花》主演陣容包括內地演員胡歌、馬伊琍、唐嫣、辛芷蕾等等，劇本改編自金宇澄同名小說，講述充滿機遇與希望嘅90年代上海，阿寶（胡歌飾）憑敢拚敢做及忠厚個性成為上海灘叱吒一時嘅寶總，直至神祕女子李李（辛芷蕾飾）出現令寶總事業與人際關係面臨考驗。雖然背景於上海，但礙於90年代都係香港發展蓬勃嘅開始，其中各種城市文化亦影響各地一班年輕人，因此香港和上海喺90年代關係密切。

《繁花》台前幕後團隊亦有唔少香港影視界精英，包括曾憑《臥虎藏龍》獲奧斯卡最佳攝影嘅香港著名攝影師鮑德熹擔任攝影指導、曾與王家衛多次合作既陳勳奇等等。《繁花》製作非常認真，拍攝耗時3年多，為還原上海90年代黃河路嘅繁華盛世情境，劇組搭建一比一比例實景並加入電腦特效，令效果更真實，加上演員全程用上海話拍攝，使觀眾更易代入90年代上海氛圍。而翡翠台播出時，將提供普通話主聲道及上海話次聲道選擇。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！