陳凱琳曾被黃秋生批《張保仔》小動作多感滋擾 坦認角色係人生污點

陳凱琳（Grace）於2013年參加香港小姐競選勇奪冠軍、「最上鏡小姐」、「旅遊大使獎」及「最受傳媒歡迎獎」，成為四料冠軍，翌年代表香港參選《國際中華小姐競選》更以大熱姿態奪得冠軍，未卸任就被安排於劇集《名門暗戰》飾演蔣勵一角，之後又出演過《四個女仔三個BAR》及《張保仔》女主角，不過就被網民狠批演技，就連影帝黃秋生亦公開批評。日前，陳凱琳與友人開直播，笑言《張保仔》係佢嘅人生污點。

陳凱琳於劇集《張保仔》飾演「黃娣妹」一角，當時就被網民批評戲屎，黃秋生亦批評睇咗《張保仔》半集就叫個仔熄電視，指覺得陳凱琳太多小動作，「依牙鬆槓」唔自然，認為好滋擾。對於黃秋生評價，連鄭嘉穎都認同講法中肯，並略嫌陳凱琳演技過於用力，但就處處保護對方，認為陳凱琳只要繼續畀心機就會不斷進步。陳凱琳當時亦表示聽到黃秋生嘅評價後有啲唔開心，但會尋求進步。

陳凱琳於近日開直播期間，有網民提及喜愛佢喺《張保仔》嘅角色，佢有禮貌地先答謝對方，但就笑言：「呢個係我人生嘅污點。因為我真係做得好差」。《張保仔》係陳凱琳首次擔正做女主角，拍劇時間好趕急而且係廠景及外景輪流拍：「我哋拍咗6個月嘅，因為我真係完全唔識做戲，無學過啦，無演過啦，但就日日Chur（拍）50個鐘，我最犀利50個鐘無瞓覺拍埋呢套劇。」陳凱琳續指：「我覺得睇返自己嗰陣時嘅表現，我係完全唔合格嘅。」

陳凱琳自2018年與鄭嘉穎結婚並先後誕下三名兒子後，減少幕前拍劇工作，創立自家品牌「雪后」之外，亦不時於社交平台大曬造型照及美妝教學，當中更有自家團隊協助拍攝，成功轉型做KOL及以節目主持為主。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！