【電影LOL】導演爆《水行俠2》變恐怖片 Jason Momoa造型由巨型栗米變暗綠龍王

·2 分鐘文章

因為新冠疫情而停擺接近一年嘅荷里活慢慢復甦,片期一推再推無錢返,一眾片廠聽執笠!老牌片廠MGM就因為《007:生死有時》數度延遲上映,導致資金週轉不靈結果被Amazon收購!

Marvel由《黑寡婦》後開始追進度,剛剛上咗由梁朝偉由頭帶落尾,演技震攝外媒嘅《尚氣與十環幫傳奇》後,11月又有《永恆族》,接住聖誕就有《蜘蛛俠:不戰無歸》,差唔多個個月都有片上!

至於另一盛產超級英雄電影嘅華納亦唔執輸,密密谷緊12月中上映由大隻型男Jason Momoa主演嘅《水行俠2》(Aquaman and the Lost Kingdom)。導演溫子仁日前接受訪問大談《水行俠2》創作靈感,指新作深受1965年一套意大利電影Planet of the Vampires啟發,將會加入恐怖片元素。

Planet of the Vampires講述太空船意外墜毀於不知名星球,船員被該星球嘅不明生物附體!唔通水行俠會被人上身?溫子仁一向擅長拍驚慄片,佢坦言恐怖片已經成為佢嘅一部份,被問到怕唔怕超級英雄片《水2》變驚慄片,觀眾會唔接受,佢回應指首集《水行俠》已建立咗黑暗調子,相信觀眾接受到!

電影剛剛發布首張「水行俠」新look劇照,由首集個上身金黃、下身翠綠加支3角叉嘅巨型栗米look,變成全身「幪面超人」暗綠龍王look,睇來俐落咗!Jason Momoa自己IG就透露今集將有更多動作場面!

至於fans連署要求換走女主角Amber Heard嘅計劃唔成功,佢繼續留守《水2》,似乎華納喺《怪獸與牠們的產地》Johnny Depp同《水行俠》Amber Heard呢對鬧出家暴糾紛嘅前度怨偶之間作出咗選擇。

《水》嘅女角們負面新聞不斷,女主角同前夫Johnny Depp打官司對簿公堂頻見報;飾演水行俠母親嘅Nicole Kidman嚟香港拍戲因為唔駛隔離惹爭議,點知拍唔夠幾日傳出同導演不和要請假返澳洲休息!不過男主角Jason Momoa戲內戲外好評不斷,為人熱情大愛,佢一個人撐得起「水行俠」有餘!

更多電影文章

【電影LOL】今期睇咩戲 尚氣/危樓深淵/惡煞

【電影LOL】Daniel Craig最後一戰!《007 : 生死有時》上畫前夕 片商推紀錄片造勢

【電影LOL】《尚氣》唔夠人氣 迪士尼搵梁朝偉狂做訪問谷戲

【電影LOL】打鬥連場 係咪虐老?75歲史泰龍拍《轟天猛將》外傳

【電影LOL】Netflix9月搞節目巡禮Tudum 3個鐘頭巨星放題新劇片段任睇

【電影LOL】戴妃電影Spencer預告曝光 幾個鏡頭交待皇室華麗背後實況?

【電影LOL】高先嘉禾經典電影重溫活動 睇奇洛李維斯張孝全青澀舊片

按此下載 Yahoo APP 9月免費送一萬個蛋撻王Q嘜蛋撻,仲有貓山王榴蓮冰皮月餅/鳳梨奶黃月餅同你賀中秋,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能