【電影LOL】《尚氣》唔夠人氣 迪士尼搵梁朝偉狂做訪問谷戲

·3 分鐘文章

首部全亞裔超級英雄Marvel電影《尚氣與十環幫傳奇》終於上映,電影初期選角消息一出,觀眾反映兩極,有人歡喜終於有亞裔超級英雄,有人唔like覺得男女主角唔靚唔型又唔夠名氣!

Marvel電影通常橫掃票房所向無敵,傳媒今次對電影評價仍相當高,爛蕃茄網專業影評有92%新鮮度!電影公司迪士尼又大細超宣傳唔俾力,劉思慕喺北美名氣一般,訪問數量唔多夠,《尚氣》勢頭一般,套戲除咗全亞裔演員主演外睇唔到有咩賣點。

男主角劉思慕好努力做宣傳,自己不停出post搞話題,之前大膽炮轟迪士尼老細Bob Chapek嘅「實驗」言論;之後又密密分享台前幕後以及佢為角色準備嘅花絮等等。不過靠佢一個出post效果有限,迪士尼可能見勢色唔對,離上映前2、3日盡力救亡,勁推飾演「文武」梁朝偉訪問出嚟!

之前《尚氣》宣傳訪問多數唔見梁朝偉,佢連首映都無出現,不過梁從影多年,國際獎項都攞唔少,名氣絕對大過劉思慕。近日接連見到梁為Hottoys 人偶宣傳,跟手又見到佢用廣東話接受美國GQ訪問,細數佢多年經典角色及同王家衛導演合作嘅幕後小插曲,咁談笑風生仲講咁多嘢嘅梁朝偉真係好耐無見過!

美國權威雜誌The Hollywood Reporter都幫手谷,剛剛出文狂讚,用「大師班」、「香港傳奇」等字眼形容梁朝偉。連《尚氣》導演Destin Cretton都盛讚佢極有準備,指梁於片場未埋位期間要求坐喺攝影機旁,日日如是睇住班crew set燈度走位,期間完全唔會玩手機;到正式埋位時,導演唔駛解畫,梁朝偉已經明哂知要點拍,仲要1 take過搞掂,Cretton笑稱想導戲都唔知講咩,因為根本無需要take2!

至於點解會接《尚氣》,梁朝偉表示佢甚少做父親角色或歹角,覺得「文武」好愛家人但唔識做老豆嘅設定好吸引。為咗演好角色,佢參考自身經歷,極罕有談及父親,話自己因為爸爸離開屋企而變得沉鬱內向,慢慢唔識同人打交道,同母親一齊睇戲成為佢忘憂良方,啟發佢日後成為演員!

如果宣傳重點一開始擺多啲喺梁朝偉同楊紫瓊度,可能反應仲好,至少華人地區受落。反正睇預告片,梁朝偉點睇都似主角!

更多電影文章

【電影LOL】今期睇咩戲 鱷魚君最後的100天/糖魔怪客/復仇殺姬/熱唱吧/叱吒風雲/爸爸,對不起

【電影LOL】打鬥連場 係咪虐老?75歲史泰龍拍《轟天猛將》外傳

【電影LOL】Netflix9月搞節目巡禮Tudum 3個鐘頭巨星放題新劇片段任睇

【電影LOL】戴妃電影Spencer預告曝光 幾個鏡頭交待皇室華麗背後實況?

【電影LOL】高先嘉禾經典電影重溫活動 睇奇洛李維斯張孝全青澀舊片

【電影LOL】《蜘蛛俠:不戰無歸》預告片流出 電影公司補鑊推官方版出場 亮點有呢幾個!

【電影LOL】Netflix邀曾國祥執導 《三體》有幾難拍?睇呢三點

【電影LOL】《梅艷芳》預告片演員陣容曝光 未見曾志偉吳若希出場

【電影LOL】Wes Anderson新片Scarlett Johansson四星列陣 點解考起迪士尼?

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!