雅虎香港新聞 【電影LOL】Netflix邀曾國祥執導 《三體》有幾難拍？睇呢三點
上星期美國傳媒報導，串流平台一哥Netflix即將開拍中國內地小說《三體》改編嘅同名劇集，第一集導演將會由香港嘅曾國祥擔任。
唔少人以為曾國祥會拍晒成套劇，其實唔少美劇都會由唔同導演負責不同集數，而曾國祥呢次嘅任務可謂相當重要，一來劇集第一集對串流作品而言真係「一集定生死」，二來呢次拍《三體》會係曾國祥首度以英語作品進軍荷里活，對佢日後發展舉足輕重。
《三體》由內地小說家劉慈欣撰寫，故事以文革時期為起點，講述大學物理學學生葉文潔向宇宙發出電波，點知被4光年以外嘅恆星系統「三體」接收到，三體同地球出現聯繫之後，2個世界所發生嘅事。《三體》難拍唔止因為涉及唔少物理學原理，已經好考導演工夫，再加上故事開端係文革時期，搵了解中國但又唔係來自中國嘅導演去拍第一集……你懂的。畢竟曾國祥前作《少年的你》講校園欺凌，呢個題材居然可以得到審批，證明Netflix都係希望曾導搞得掂呢個敏感話題。
舊年Netflix宣布拍《三體》嗰陣，亦公布咗編劇人選包括《權力遊戲》（Games of Thrones）團隊兩名主力David Benioff及D.B. Weiss，仲有True Blood編劇Alexander Woo。唔少網民對於呢個編劇好有意見，一來因為由外國人處理發生喺中國嘅故事，好大機會失真；二來《權力遊戲》被唔少觀眾認為係爛尾，由《權》2位編劇執筆《三體》，好大機會出事！Netflix搵喺加拿大成長嘅曾國祥，無非係想佢平衡故事以至創作過程當中嘅中西文化碰撞。
本來《三體》未拍就已經新聞多多，擁有版權嘅網絡公司老闆舊年懷疑畀人落毒殺死，而內地網絡平台騰訊亦都已經拍好劇集版準備搶先登場。《三體》原著2015年獲得拜幻小說界最高榮譽「雨果獎」，喺英語地區大受歡迎，連前美國總統奧巴馬及Facebook嘅Mark Zuckerberg都係書迷，Netflix呢次相當重視個project，好期待曾國祥會點拍！
更多電影文章
【電影LOL】今期睇咩戲 怒火／回憶潛行／汪汪隊立大功大電影／蠟筆小新劇場版／千年一問
【電影LOL】《梅艷芳》預告片演員陣容曝光 未見曾志偉吳若希出場
【電影LOL】Wes Anderson新片Scarlett Johansson四星列陣 點解考起迪士尼？
【電影LOL】《男兒當入樽》電影版再有消息 下年秋季日本上映
【電影LOL】迪士尼改發行模式 當《尚氣》白老鼠？男主角劉思慕公然爆粗頂撞老細 或另有原因
【電影LOL】《星球大戰》金像導演J.J Abrams新作 竟然係UFO紀錄片 仲要Youtube有得睇！
【電影LOL】被睇死後立誓 拍戲發達唔益阿媽 名導塔倫天奴堅找數唔俾錢屋企
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
