雅虎香港新聞 【電影LOL】Wes Anderson新片Scarlett Johansson四星列陣 點解考起迪士尼？
韋斯安德遜（Wes Anderson）執導嘅《法蘭西諸事週報》受疫情影響片期一拖再拖，美國改到今年10月先上映，不過並無因此拖慢佢下套戲嘅進度，新作連名都未公佈，已經密鑼緊鼓喺西班牙開機拍緊！
置中畫面及精美配色成為韋斯安德遜嘅電影特色，台灣仲封佢做「對稱大師」，有睇開佢作品嘅觀眾應該留意到導演特別鍾意幾粒星，Bill Murray、Adrien Brody、Jason Schwartsman同Tilda Swinton差唔多成為固定班底，套套都有份！
不過近年韋斯安德遜作品越嚟越大堆頭仲越嚟越勁，新作有以上4粒巨星之外，仲有影帝湯漢斯（Tom Hanks）、憑「小丑女」彈起成為一線女星嘅Magot Robbie，最新消息仲有「黑寡婦」Scarlett Johansson加入！
Scarlett Johansson之前幫韋斯安德遜嘅《犬之島》為Nutmeg一角獻聲，今次終於見人！由於導演保密功夫到家，暫時未有任何關於套戲嘅故事、人物角色等資料，未知Scarlett Johansson戲份有幾重，不過外媒Deadline就確定佢己經抵達西班牙進行拍攝。
套戲集齊咁多粒巨星，如果首映齊人出席，星光應該仲勁過電影頒獎禮。不過外界更好奇幕後花絮，根據IMDB網站顯示，韋斯安德遜新作將由迪士尼旗下Fox Search Light發行，而Scarlett Johansson依家就為咗《黑寡婦》戲院串流平台同步上映令佢損失5000萬美金分成， 入稟告迪士尼毀約。
官司仲未開始，迪士尼依家應該好頭痕，如果告得成嘅話分分鐘會有更多明星仿效，就算告唔成都同Scarlett Johansson反哂面，最慘又唔可以明刀明槍玩抵制，韋斯安德遜套新戲星光燦爛到咁，點都要開行火力做宣傳谷票房，就算迪士尼唔再搵Scarlett Johansson拍戲都一樣避唔開要繼續合作！相信錢銀面前應該無隔夜仇啩？
更多電影文章
【電影LOL】今期睇咩戲 媽媽的神奇小子／爆機自由仁／反轉方舟動物園／森林守護隊
【電影LOL】《男兒當入樽》電影版再有消息 下年秋季日本上映
【電影LOL】迪士尼改發行模式 當《尚氣》白老鼠？男主角劉思慕公然爆粗頂撞老細 或另有原因
【電影LOL】《星球大戰》金像導演J.J Abrams新作 竟然係UFO紀錄片 仲要Youtube有得睇！
【電影LOL】被睇死後立誓 拍戲發達唔益阿媽 名導塔倫天奴堅找數唔俾錢屋企
【電影LOL】奧運過後繼續撐運動員 《媽媽的神奇小子》展現蘇樺偉跑步人生
【電影LOL】冇題材手遊都殺！Netflix將「食雞game」PUBG拍成動畫
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
