雅虎香港新聞 【電影LOL】Netflix新劇《三體》內地監製疑被毒殺身亡 分紅不勻動殺機？
現實離奇過小說！剛過去聖誕節，內地游族網絡股份有限公司發聲明指，公司董事長兼大腦林奇離世消息，終年39歲。游族網絡做game起家，近年業務擴展至影視領域，其中最矚目一定係擁有雨果獎得主－劉慈欣著作《三體》版權。
科幻小說《三體》於2008年出版，不過據作者敍述，當年內地未盛行買IP改編成影視作品，加上未有其他公司出價，所以以10萬人民幣極低價錢將改編版權售予導演張番番。游族決定投資20億人仔拍攝電影版，原訂2016年面世，不過《三體》英文譯本於2015年獲得「雨果獎」，小說於英語地區大受歡迎，連前美國總統奧巴馬及Facebook創辦人Mark Zuckerberg都係書迷！
攞獎過後《三》知名度大增，游族收購張番番公司得到電影版權，更特別為《三》成立新公司三體宇宙，2018年大手筆用1.2億買埋《三》電視劇，成為《三體》版權方，好出力咁將小說改編成遊戲、動畫、電影及劇集。
劉慈欣另一被改編成電影嘅作品《流浪地球》喺內地有驚人票房，雖然當中嘅強國意識未必人人接受到，不過足以証明科幻電影有市場，仲令擁有《三》版權嘅三體宇宙備受矚目。加上《三》於英文地區有一定知名度，吸引到Netflix投資，林奇監制，原作者劉慈欣擔任顧問，美劇劇本則由《權力遊戲》兩大主筆David Benioff、D.B Weiss及《真愛如血》嘅Alexander Woo一齊改編，消息一出當然股價飛升！
但係呢個時候就發生林奇死亡事件。根據內地媒體報導，林奇疑似被同事落毒謀殺，而上海警方23日晚出嘅通報指，已鎖定其同事39歲嘅許某。雖然事件仍在調查中，不過嫌疑犯嘅描述皆指向三體宇宙前CEO許垚。據報許垚於收購《三》版權起重大作用，不過似乎並未得到相應嘅回報，林奇近期就《三》接受訪問，講到《三》影視成功與否都係佢一個人承擔。
老細在外攞威無可厚非，相信無分紅俾做實事嘅CEO先係導火線，《中國經濟周刊》報導許因為工作不滿，所以喺外國買入藥物，連續投藥令林奇慢性中毒，內幕講到似層層，真相未出就已經有奇情案發經過，做新聞好似做埋編劇咁！
Netflix暫未回應《三》劇集何去何從，未知計劃會否因為林奇離世而擱置。不過早前作者劉慈欣支持新彊政府嘅維族再教育營而備受抨擊，Netflix闊佬懶理回應「劉係《三體》作者兼中國公民，但並唔係劇集創作人，其言論唔代表Netflix」就算。睇得出Netflix好重視美劇《三體》，最後拍唔拍得成遲下就知！
更多電影文章
【電影LOL】新片Minari講美國新移民 居然唔當係美國片 金球獎準則被狠批
【電影LOL】玉女無以為繼 Vanessa Hudgens拍聖誕賀節片殺出血路
【電影LOL】沙拉保夫性醜聞纏身 Netflix極速割蓆新片除名
【電影LOL】《神奇女俠2》票房失利 打鬥場面唔夠刺激 觀眾負評︰以為睇溫情小品
