【電影LOL】《殺出個黃昏》林家棟蝕錢都要撐老戲骨 謝賢馮寶寶林雪火花四濺

·3 分鐘文章

踏入暑假旺季,加上荷里活片隨住漫威電影《黑寡婦》開始回歸,戲院終於熱鬧返,今個星期值得睇嘅仲有港產片《殺出個黃昏》!

近期接連上咗《濁水漂流》、《遺愛》、《手捲煙》等幾部港產片,題材現實偏沉重,對好多想支持本土電影嘅觀眾嚟講未必係首選,由林家棟監製、高子彬執導《殺出個黃昏》以黑色喜劇包裝,一定有笑位,入場意慾大增!

《殺》故事講述田立秋(謝賢 飾)、蔡鳳(馮寶寶 飾)、葉一叢(林雪 飾)於60年代曾是讓人聞風喪膽的殺手組織,無奈時代蛻變,三人只好脫下戰衣,重歸平凡生活。過去叱吒江湖的殺手「秋」,現今已過花甲之年,只能以提刀削麵糊口,奈何熱血關節亦難敵機械手臂,唯有被迫熄爐。

「鳳」有多重身份,皆係歌廳負責人又係表演者亦係母親、奶奶兼嫲嫲,表面睇落人生美滿,實情同個仔關係麻麻,而「叢」人到中年周身病痛、對性事有需求卻又孤身一人。

「秋」突獲專責情報的歌廳老闆娘「鳳」重召出山,夥拍擅長駕駛的「叢」,不料目標人物竟要求買兇自殺!獨門服務的「耆英天使」因此應運而生,主打孤苦無依和百病纏身的遺老。一次接case遇上被雙親拋棄,再被男友狠飛的妙齡少女屈雪瑩(鍾雪瑩 飾),被串「你哋啲殺手咁老㗎?」,2個人卻陰差陽錯變成無血緣嘅爺孫。幾位老人,如何繼續活出精彩人生?

林家棟曾談及開《殺》原因,有見年長演員工作機會減少感到不值,所以蝕錢都要支持。而幾位主角謝賢、馮寶寶及林雪演出確實精彩,宣傳爆點在於「四哥」謝賢肯除低墨鏡以素顏上陣,84歲嘅佢仲有去戲院戲票,老而彌堅!

電影中嘅「殺手」身份超現實,不過殺手一樣係人,老咗同社會脫節會失業,「叢」性事後不適去醫院,排專科一樣要排至少一年,「鳳」再好身手一樣被個仔送入老人院。「殺手」一樣有唔少老人煩惱,一樣需要人關心!

《殺》用黑色喜劇包裝現實生活問題,笑中帶苦,過後又回甘。睇完《殺》最大得著係朋友好緊要,知心好友比家人更可靠!

更多電影文章

【電影LOL】今期睇咩戲 《黑寡婦》上畫新片讓路 得返建黨電影《1921》對撼

【電影LOL】敲定名模王丹妮演《梅艷芳》 造型曝光似唔似梅姐?

【電影LOL】《赤BIG靈靈狗》10呎咁高卡通紅狗狗拍電影版 又因咩事有負評?

【電影LOL】內地重拍《九品芝麻官》焦點居然係豐滿女主角

【電影LOL】《拆彈專家2》《哥斯拉大戰金剛》分佔香港上半年電影票房中西片冠軍

【電影LOL】成棟樓直插地底!李光洙新戲演出港人噩夢

【電影LOL】John Cena就辱華言論道歉幫到手《F9狂野時速》內地收2億美元

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能