雅虎香港新聞 【電影LOL】奧斯卡得獎動畫短片《包》華裔女導演新作《熊抱青春記》青春期少女「見紅」煩惱
迪士尼與彼思有新搞作，今次係由奧斯卡最佳動畫短片《包》(Bao)華裔女導演石之予(Domee Shi)自編自導嘅《熊抱青春記》(Turning Red) ！
電影剛剛出咗預告片，故事講述13歲嘅美美踏入青春期，身體心理都開始大轉變，尷尬、煩躁咩都齊，日子有苦有甜，偏偏美美比其他青少年多個煩惱－一激動興奮就會變身成為巨大貓熊！預告片中可以見到美美仲有個直升機阿媽，專登走去學校䏜實個女 ，仲同學校保安大打出手，引嚟成班同學齊齊食花生，美美即時尷尬到變巨熊！
Pixar推出多部感人作品，不過幕前幕後都係男性主導多，《熊》係繼《勇敢傳說》、《玩轉腦朋友》、《海底奇兵2》及《超人特工隊2》後第5部以女性做主角嘅動畫，石之予係Pixar史上為第2位執導長片嘅女導演，更係首位華裔女導演！
《熊抱青春記》預告片仲用咗80後必識唱嘅Backstreet Boy名曲Larger Than Life做主題曲，音樂一起，青春回憶返哂嚟！
加上以華裔女孩美美做主角，配以加拿大多倫多為背景，片中出現多倫多TTC輕軌車、著名CN塔及華埠等，相信電影當中有唔少石之予自己嘅成長故事。
《熊》搵嚟Killing Eve嘅吳珊卓（Sandra Oh）幫直升機媽媽配音，電影講成長嘅煩惱之餘，移民後代嘅故事又食正荷里活多元文化嘅需求，題材有一定叫座力。不過預定下年3月上映嘅《熊》背負強大票房壓力，因為受疫情影響，2020年嘅《1／2魔法》及《靈魂奇遇記》未能喺北美戲院上映，票房大失血，《熊抱青春記》將會係戲院重開後Pixar首套上映作品，不容有失！
更多電影文章
【電影LOL】今期睇咩戲 殺出個黃昏／電影屁屁偵探／密室逃殺: 倖存者遊戲／太空也入樽：改朝換代
【電影LOL】導演會頒獎禮 《奪冠》掃4大獎 周國賢首度稱帝
【電影LOL】《當男人戀愛時》好耐冇去台灣 定係催淚故事令你想喊？
【電影LOL】Margot Robbie拍Barbie真人版電影 故事竟然係唔夠靚被踢出Barbieland!
【電影LOL】棟篤笑女星遇上大話賤男 被昆經歷寫成劇本片廠爭住要
【電影LOL】《殺出個黃昏》林家棟蝕錢都要撐老戲骨 謝賢馮寶寶林雪火花四濺
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
