雅虎香港新聞 港產飲品｜馬灣可樂味似酸沙可樂糖喚兒時回憶 餐廳老闆土炮製作變量產
【Yahoo 新聞報道】可樂幾乎人人喝過，屬於馬灣的可樂又是甚麼味道？馬灣一家餐廳自家製作具「香港味」的「馬灣可樂」，迎合島上的小顧客，更變成馬灣「手信」。餐廳與本土汽水廠合作量產罐裝，在各大零售商出售。餐廳老闆希望更多本地及海外港人喝到純天然、健康、無色素，同時注滿港人回憶的「非一般可樂」。
記者：Carmen C.
攝影記者：HLKP, Carmen C.
「馬灣可樂」的罐上，寫著「太陽系委員會出品」。「太陽系委員會」並非一個「委員會」，而是2年多前在馬灣開設的cafe。曾居於馬灣的老闆Jimmy解釋，「太陽」代表溫暖，「委員會」則因馬灣舊村曾經有幢向海建築物「馬灣鄉事委員會」，「（牆身）紅白色個字體我覺得好靚，所以我哋個招牌嘅字體同英文字體，都係跟返佢個style」。Jimmy本身亦有設計背景，「會執著喺呢啲位，有個故事先可以發展落去」。
「呢度嘅目標其實係想做現代版嘅村公所或者社區中心」，Jimmy希望餐廳與街坊有所連結，故除了咖啡，太陽系委員會還有興趣班，導師亦是在馬灣居住，「想睇吓呢一個小嘅地方，有無嘢可以供給返畀馬灣嘅人呢？」店舖開業後，Jimmy就想到自製「馬灣可樂」。
無麥當勞的小島 為小孩自製純天然可樂
cafe的飲品當然以咖啡為主，但Jimmy發現「呢度最多嘅就係寵物同小朋友，我哋個menu應該要有啲小朋友飲到嘅嘢」。Jimmy笑說：「馬灣係一個島，係無麥當勞嘅，所以我當時就出咗個薯條加可樂」，但這款可樂亦非傳統快餐店可見的，「可唔可以自給自足，自己整可樂呢？想自己做一個可樂畀小朋友飲，健康嘅、唔會太甜、唔會有色素嘅。」Jimmy以檸檬汁、肉桂、肉豆蔲、橙皮等材料，與糖一同煲成糖水，再加入梳打水製成「馬灣可樂」，「係土炮啲嘅做法」。味道亦不是一般可樂的感覺，而是不少港人小時候吃過的酸沙可樂糖，「係以前香港嘅味道、細個嘅回憶」。
Jimmy其後與本土汽水廠「閣樓釀造」合作，將馬灣可樂量產。Jimmy眉飛色舞，憶述與該廠相識經過時就像談及心上人。他指留意到閣樓釀造出產自家湯力水，「一睇正喎，我好鍾意，覺得佢哋係會friend到嘅一班人嚟」，不久後更收到該廠創辦人Adrian的試飲邀請，Jimmy笑稱：「我終於等到佢搵我喇！」Jimmy雙方一見如故，「係同一個vibe（氛圍）嘅人」，亦勇於創新，一拍即合。
「希望大家見到馬灣可樂，就諗起馬灣」
閣樓釀造聯合創辦人、專責設計的Benjarmin指，馬灣給人陽光的感覺，「舒服、好玩」，加上馬灣可樂不如一般可樂般是啡色，而是偏黃綠色，故紙標亦以綠色、復古、嘉年華及波浪為設計主軸。Jimmy形容合作過程「大家都好知大家想做啲咩」，故研發過程相當順利，僅花兩至三個月，就量產成功，是閣樓釀造開業後第一批合作推出的產品，第一批售罊後再製作第二批，並於超市上架、在特色餐廳出售。
Jimmy也希望「馬灣可樂」可供街坊宴客，「我呢個島有自己嘅可樂，呢件事幾有型！」亦有街坊視「馬灣可樂」為馬灣手信，「希望大家見到馬灣可樂，就諗起馬灣、諗起我哋」。他亦希望推廣至英國、加拿大及台灣等地，讓更多在外的香港人喝到兒時味道。
「閣樓釀造」簡介
本土汽水廠「閣樓釀造」由三個大男孩於2021年開設，位於觀塘偉業街某工廠大廈的閣樓。工廠斥資300萬元，最初名叫Hong Kong Cannery，以代工飲品為主，生產技術就由曾任酒廠的創辦人Edward主理。至2022年初，因疫情關係，餐廳及酒吧大受打撃，紛紛叫停飲品生產。代工訂單大大減少，三人便決定創立閣樓釀造，自行研製湯力水、麻辣薑汽水等。
【馬灣可樂售價】
馬灣可樂 （一罐）｜25 元
馬灣可樂 （六罐）｜120 元
【24 罐組合裝｜499 元（全港免費送貨）】
馬灣可樂（九罐）
閣樓釀造 – 麻辣薑汽水（三罐）
閣樓釀造 – 有汽香水檸檬鐵觀音（三罐）
閣樓釀造 – 有汽士多啤梨瑪黛茶（三罐）
閣樓釀造 – 草本湯力水（三罐）
閣樓釀造 – 梳打水（三罐）
訂購網址：https://solcommittee.com/product/sol-cola/
【相關報道】
港產飲品｜攀山涉水搜羅被遺忘的本土水果 90 後手製 kombucha 保留香港味道
港產飲品｜馬灣可樂味似酸沙可樂糖喚兒時回憶 餐廳老闆土炮製作變量產
