狄波拉最愛《中年好聲音2》呢位選手 瘋狂翻睇唱歌片段 連甄妮都大讚

《中年好聲音2》結果塵埃落定，七強選手忙完決賽之後開始出席各大小活動。日前經理人陳淑芬搞生日及答謝晚宴，請到商台前揸fit人俞琤、姜大衛、狄波拉等圈中猛人出席，而《中2》人馬都有現身負責表演。

資深傳媒人汪曼玲都喺陳太呢場盛宴，佢發文話「居然可以和《中年好聲音2》的冠亞季軍合照」，又post出拉姑同《中2》三甲古淖文、譚輝智、顏米羔以及人稱「大魔王」嘅安雅希合照。汪曼玲仲踢爆「拉姑最中意譚輝智，他比賽唱歌的片段，可以重覆睇3、40次」，的確好迷！

自稱從未參加過歌唱片賽嘅譚輝智得到《中年好聲音2》亞軍之外，並獲得由觀眾投選嘅「觀眾最愛好聲音大獎」，可見佢相當有觀眾緣。拉姑之外，向來有要求又敢言嘅樂壇前輩甄妮姐姐，原來都有睇《中年好聲音2》，佢知道拉姑鍾意譚輝智，都留言讚「睇落有眼光，群群之中他最好，可造之才」。而甄妮對於《中2》賽果都頗有意見，留言話「哦！原來評判喜歡油膩誇張精」、「唉！老油條，沒有成長的空間」，被指演出有「江湖味」嘅冠軍古淖文，聽到未？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！