陳奕迅南京個唱有觀眾舉中指亂叫囂 Eason疑嬲爆背台唱《任我行》

正在舉行巡迴演唱會嘅陳奕迅，日前喺南京場遇到觀眾不禮貌對待，Eason之後懷疑心情受影響，嬲到俾個背脊觀眾睇！

內地社交平台唔少陳奕迅歌迷都有發文還原事件，有指4月6日(周六）嘅演出時，有坐喺稱為「內場」嘅前排觀眾席觀眾，喺Eason唱廣東歌《致明日的舞》時，面向舞台舉起中指拍照！根據其他歌迷所講，同一晚有觀眾喺音樂停頓位亂入「代唱」，而且Eason嘅耳機似乎出問題，令佢演出時擰晒頭。

唔知Eason係咪睇到呢位「中指」歌迷，後來喺唱《任我行》時，有半首歌係背住觀眾唱。不過到歌曲後半段Eason已經面向返觀眾演唱，到最後更親吻道具汽球。之後Eason唱《路…一直都在》時見到有觀眾企起身同佢互動，心情好返好多，終於面露笑容。而根據星期日晚另一場Eason南京演唱會嘅現場片段，Eason唱《任我行》時全程向住觀眾，似乎6號嗰晚係「特別版本」。

內地歌迷一面倒撐Eason，直斥舉中指觀眾係「野人」，甚至有人想人肉搜索呢位「中指」觀眾。有留言認為今次演唱會歌單真係要忠實fans先識欣賞，唔一定有大熱歌曲，批評好多人為打卡搶飛，結果真正fans反而入唔到場。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！