雅虎香港新聞 電影LOL︳吳宇森相隔18年後重返荷里活 新作大量打鬥冇對白片商搶住買
吳宇森相隔18年後重返荷里活！一年一度美國影視展（American Film Market)即將舉行，據外媒Deadline報導今年其中一套片商極感興趣、要爭奪發行權嘅電影係吳宇森導演最新動作片Silent Night!
吳導嘅《英雄本色》、《喋血雙雄》屬港產片經典，至今仍然津津樂道，其後去荷里活發展拍過《職業特攻隊2》、《奪面雙雄》等大片，對上一套荷里活作品已經係2003年由Ben Affleck主演嘅《致命報酬》（Paycheck）。當年《致》拍攝成本約6000萬美金，美國票房收得5300萬美金，全球票房共收1.1億美金。
《致》票房未如預期，吳宇森導演重心亦轉回華語市場，拍咗套集齊梁朝偉、金城武、張震、胡軍、趙薇及林志玲等超級影星嘅古裝大片《赤壁》（2008年）上下集，可惜有咁多粒星加上《三國演義》劇情，電影評價及票房都麻麻。
2014年再拍由章子怡、宋慧喬、金城武、黃曉明、長澤正美、秦海璐等主演嘅《太平輪》電影，故事改編自真人真事，演員陣容夠哂吸引力，不過香港觀眾對故事興趣唔大，反應一般。吳導對上一套作品已經喺2017年由張涵予、福山雅治、戚薇及河智苑等主演，香港、中國大陸、韓國與日本共同製作，為紀念日本影星高倉健而翻拍嘅日本故事《追捕》。
吳宇森導事隔4年再次執導新作Silent Night將會零對白，以肢體取代語言，全片只有大量動作場面！電影講述父親為死去兒子復仇，據聞新片好大機會得到Capstone投資，由《殺神John Wick》班底監製，由《自殺特攻》大隻男星Joel Kinnaman主演！
除咗Silent Night，之前吳導宣布有計劃翻拍《喋血雙雄》，周潤發一角將會改由女性飾演。近年荷里活動作片大熱，《殺神》系列、《救參96小時》等少說話多打交嘅電影大受歡迎更發展成系列電影，其中有唔少港產動作片嘅影子，吳宇森導演嘅動作片喺荷里活佔一席位，難怪再次回歸拍片，外國網民咁期待。
更多電影文章
電影LOL︳今期睇咩戲 一級指控／馬達．蓮娜／蘇豪的最後一夜／淺田家／血魔獸／龍與雀斑公主
電影LOL︳迪士尼拍《波西傑克森》美劇 原作者親自執筆費事電影版又爛尾
電影LOL︳九把刀再執導 《月老》搵柯震東主演 再現《那些年》奇蹟？
電影LOL︳DC開拍《蝙蝠女》電影 最搶眼卡士係呢位暴肥前男神
電影LOL︳Barbie真人電影陣容越整越強 Ryan Gosling演真人版Ken
電影LOL︳Anson Lo盧瀚霆首部電影《假冒女團》男扮女裝兼著道士袍跳舞
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載
