雅虎香港新聞 電影LOL︳《壞蛋獎門人4》夾計 NBA球星腩肉哥Jokic變身犀利哥
而家做電影宣傳，識玩社交媒體呢啲基本要求啦……唔係要你識出個post就得，而係要點樣度條橋令網民們瘋傳，再返到嚟俾我地呢啲寫手寫一次呀。
上個星期六，《壞蛋獎門人4》就玩咗一次高質示範。話說NBA季後賽開打，上屆總冠軍丹佛金塊喺首圈面對上屆西岸決賽對手洛杉磯湖人。球員場上表現以外，開場前到達球場嘅造型都好多人留意，搞到行入球場條走廊好似巴黎時裝週嘅天橋咁。
丹佛金塊當家球星、拎過2屆MVP嘅Nikola Jokic當日就以黑色拉鏈jacket加間條頸巾現身。呢身打扮，似十足《壞蛋獎門人》嘅主角犀利哥(Gru)。好快，各大媒體開始share呢張相，網民當然跟住share同討論，因為人稱「腩肉哥」嘅 Jokic，由個look到個樣都好似犀利哥。
正當大家以為Jokic同犀利哥撞衫啫，殊不知場波中間嘅廣告時間，Jokic喺一個廣告入面，向飾演輔導員嘅女士講，有次佢著套西裝去比賽，點知俾人話佢似犀利哥，而最大困擾係……成班minions以為Jokic真係犀利哥。Jokic拉起窗簾，又真係有一班小黃人喺出面。原來呢個係《壞蛋獎門人4》嘅電影廣告，配合埋開場前已經share緊嘅「Jokic扮犀利哥」造型照，觀眾話咁快就get到成件事。亦即係話，Jokic係特登著到似犀利哥嘅。
要配合咁多個方面先搞得起呢個企劃，《壞蛋獎門人4》嘅宣傳團隊真係抵讚。希望香港片都可以有咁出色嘅campaign，而唔係靠謝票谷票房……
更多電影文章
電影LOL 周五電影快報︳Netflix老細保證內容「重質重量」／馬田史高西斯拍唔到歌王傳記片係因為…／荷里活工潮過後 影視行業開工量減少
電影LOL︳奇洛李維斯聲演《超音鼠3》 做反派 仲有3套新片在手 有冇時間結婚？
電影Rust道具槍走火射殺女攝影師案件 劇組槍械專家被判監18個月
電影LOL︳《美帝崩裂》成淡市票房冠軍 出品獨立片廠A24有力挑戰影壇巨企
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
