電影LOL︳《美帝崩裂》成淡市票房冠軍 出品獨立片廠A24有力挑戰影壇巨企

四月中，過完復活節又未到夏季大片檔，算係北美影市淡季。上周末票房冠軍由新片《美帝崩裂》以2570萬美元（下同）開畫成績奪得，睇數字平平無奇，但原來係《美》出品片廠A24首次有出品電影成為票房冠軍，亦創下公司成立12年來開畫票房紀錄。

比起迪士尼、派拉蒙呢啲大公司，A24梗係細得多，而且出品以獨立作品為主，票房當然爭一大截。不過A24勝在眼光唔錯，短短日子已經做出一定成績，得意之作包括2016年上映、獲得奧斯卡最佳電影嘅《月亮喜歡藍》。而《可憐的東西》導演Yorgos Lanthimos前作《單身動物園》、《聖鹿獵殺》；《芭比》導演Greta Gerwig首套執導長片《不得鳥小姐》都係A24出品，可見相人眼光奇準。

A24嘅傑作一定要提《奇異女俠玩救宇宙》，上年成為首間獨立片廠勇奪奧斯卡最佳導演及電影大獎，並且造就楊紫瓊成為影后之外，電影全球總收1億4340萬元，至少係成本嘅接近6倍，呢啲咪係叫好叫座囉。而呢期嘅《美帝崩裂》，雖然片中有大量美國內戰場面，5千萬嘅成本已經係A24最高成本之作，但一早搞掂賣版權工作，北美開畫條數只係錦上添花。

A24另一特色係相當多產，單係舊年已經有超過20套作品推出，而且唔少作品都成功以小搏大，舊年上映嘅《手靈》以唔過5百萬成本，全球狂收9200萬！近年唔少大廠嘅大片仆直，埋單打個和都要偷笑，反觀A24細注落場更好回報，似乎有機會靠獨立片打出一片天。

更多電影文章

電影LOL 今期睇咩戲︳但願人長久／破墓／美帝崩裂／排球少年!!垃圾場的決戰

電影LOL︳業界大事CinemaCon 迪士尼高層爆粗讚《死侍》贏盡掌聲

電影LOL︳《BJ單身日記》宣布拍第4集明年情人節上映 當年講溝仔而家講湊仔？

電影LOL︳Zendaya大讚新片床戲有「動作指導」呢份工原來要做呢啲嘢

電影LOL︳《斷背山》失落奧斯卡最佳電影 李安歸咎評審歧視同志片

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！