電影LOL︳《蟻俠》內地票房輸俾《毒舌大狀》《超級瑪利歐兄弟大電影》照攻中國市場

漫威電影都有票房失靈嘅時候！漫威接連幾部《尚氣》、《永恒族》以及《蜘蛛俠：不戰無歸》於內地上映無期，到《蟻俠與黃蜂女：量子狂熱》終於可以連埋中國全球同步上映，以為內地觀眾餓咗咁耐票房唔破紀錄都至少保持上集水平，點知《蟻3》上映1星期先得1億多啲人仔，同上集收8億差天共地。

《蟻》喺內地電影網站貓眼、淘票票等評分不俗，不過票房一樣急劇下降，上映2周周末收得700萬，仲低過排片少過佢嘅《毒舌大狀》（內地片名：《毒舌律師》）百幾萬！《毒舌大狀》香港已破億票房，內地上映3日收咗4600萬，《蟻俠》作為漫威出品，成績又真係強差人意。

內地觀眾對荷里活電影無以往咁狂熱，《阿凡達：水之道》、《蟻3》票房不如預期，不過似乎無礙片廠繼續搶期上片期望掘到金。任天堂、Illumination 製作、環球影業出品嘅《超級瑪利歐兄弟大電影》確定4月5日於內地上映，仲早過北美兩日！

電影改編自家傳戶曉遊戲，故事當然喺瑪利歐點樣過5關斬6將咁拯救公主啦。《超》由《LEGO 英雄傳2》《迷你兵團2》馬修霍高編劇、《少年悍將GO！》電影版共同創作者亞倫霍瓦夫 、米高傑勒尼克聯合導演，而任天堂「瑪利歐之父」宮本茂亦有落場監製。

《超》落重本搵咗「星爵」Chris Pratt為瑪利歐配音、《后翼棄兵》Anya Taylor-Joy聲演碧姬公主 (Princess Peach)、《賤鄰》Seth Rogen聲演咚奇剛 (Donkey Kong)以及《逃出魔幻紀》系列影星Jack Black聲演大魔王庫巴 (Bowser)。雖然去到內地會變成配音版，荷里活星光無咩加分功能，不過話哂係合家歡電影，有望收得好過《蟻俠3》啩？

更多電影文章

電影LOL 今期睇咩戲 ︳殘影空間／人肉搜尋2／大毒bear／哈勇家／鬼滅之刃 上弦集結，前進刀匠村／愛Plan B

電影LOL︳楊紫瓊關繼威贏美國演員公會獎 奧斯卡勝算再提高？

電影LOL︳《玩轉腦朋友2》情緒專員大批湧現？Pixar幕後主腦爆︰最多有27個

電影LOL︳Hellboy漫改電影三度重啟 導演講明︰一定兒童不宜

電影LOL ︳荷里活新風向 商業秘辛拍成電影 《俄羅斯方塊》唔止打機咁簡單

電影LOL︳《小魚仙》預告片收負評 網友齊插︰特效可唔可以做好啲？

電影LOL︳同Joaquin Phoenix愛到喪心病狂 Lady Gaga演新版小丑女劇照曝光

電影LOL︳「趙喜娜」全面進場？John Cena黑絲短裙look拍新戲

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！