電影LOL︳奧斯卡女角獎項預測 妮歌潔曼廿年後再開齋要問過謝茜嘉 Ariana DeBose贏面大

最佳女主角提名名單：

謝茜嘉積絲婷《Eyes of Tammy Faye》

Olivia Colman《失去的女兒》

彭妮露告絲《Parallel Mothers》

妮歌潔曼《成為里卡多之路》

姬絲汀史釗活《史賓沙》

又要老土講句︰勢均力敵！但係都幾肯定，可以先剔走彭妮露告絲，因為唔少美國觀眾（包括評審）都對外語片有些許抗拒，只有《上流寄生族》呢類成為話題嘅戲先至吸引到青睞。

其餘幾位，有齊得獎理由。演改編人物故事嘅有謝茜嘉積絲婷、妮歌潔曼同姬絲汀史釗活，排資論輩阿姐級有Olivia Colman同妮歌潔曼，外界認為係時候要上位嘅有謝茜嘉積絲婷，有口碑有驚喜嘅有姬絲汀史釗活，點揀？

奇就奇在呢4位嘅提名作品，喺今年奧斯卡其他方面嘅提名唔多，更難靠套戲嘅勢頭佔優勢。Olivia Colman近幾年大爆發，cast中好角色亦表現突出，5年內3度獲提名女演員獎項。正正因為咁，評審可能將手上一票交俾其他女星。再剔除的話，第一次提名嘅姬絲汀史釗活贏面稍遜，畢竟過去嘅影后都至少得到演員工會大獎（SGA)提名，而「吸血女」今年無份。

照咁睇，贏咗SGA嘅謝茜嘉積絲婷咪大熱？是的，謝茜嘉今次有突破演出，特技化妝化到似足本尊Tammy Faye，唱歌之餘仲連口音都模仿神似，奧斯卡評審最buy。但妮歌潔曼喺《成為里卡多之路》由頭帶到尾，而且阿姐都20年未拎過影后喇，排資論輩都係奧斯卡另一傳統，砌低後輩唔出奇。

最佳女配角提名名單：

Jessie Buckley《失去的女兒》

Ariana DeBose《西城故事》

茱迪丹茲《貝爾法斯特》

姬絲汀鄧絲《犬山記》

Aunjanue Ellis《王者世家》

相比之下，女配角競爭形勢最為明顯，相信係姬絲汀鄧絲(Kirsten Dunst)大戰Ariana DeBose。Kirsten由細演到大，同期嘅Anne Hathaway做過一姐亦拎埋奧斯卡，Kirsten相對行得慢，而《犬山記》無論係電影整體以至戲中角色表現都足以說服評審投票。但係對手Ariana DeBose實在太強，演員工會大獎、金球獎同英國電影學院頒獎禮都奪獎而回，睇怕可以再下一城。

更多電影文章

電影LOL︳Netflix試行非同住者共用帳戶收費 以後隨時冇得開心share

電影LOL︳奧斯卡男角獎項預測 《王者世家》韋史密夫有望做影帝 男配角爭崩頭

電影LOL︳《高校18禁》人氣34D索女Sydney Sweeney加盟Marvel外傳電影《蜘蛛夫人》

電影LOL︳張家輝終於有新片 《新秩序》導演係《掃毒》古惑仔

電影LOL︳發夢靚妹變超級英雌 新劇Ms. Marvel預告片登場 6月Disney+上架

電影LOL︳Anson Lo盧瀚霆拍英國導演新片 夥日泰韓星卡士重慶大廈打喪屍

電影LOL︳古天樂監製《一家人大戰機械人》揚威動畫頒獎禮 大有機會拎埋奧斯卡？

電影LOL︳傳明珠台連續2年唔播奧斯卡 大會批准外地參加者免隔離

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載