雅虎香港新聞 電影LOL︳安夏菲慧爆曾被要求試鏡同十個男人錫咀 直言「好嘔心」
美國女星安夏菲慧(Anne Hathaway）近期為主演兼監製嘅新片The Idea of You宣傳，少不免會爆下料。憑《斷背山》等作品喺千禧年後走紅嘅安夏菲慧，喺雜誌訪問憶述佢仲係新人嘅時候，有一次被要求參加試鏡，但係製作單位同佢講，因為要試下佢同男角有冇火花，於是會有10個男演員會嚟試戲，「你要同佢地錫錫架，意唔意外高唔高興開唔開心？」。
仲算新嘅安夏菲慧當時覺得「係咪我有問題，我一啲都唔興奮囉」，而且覺得「好嘔心」，但因為經驗唔夠而且驚say no會被人話佢難搞，唯有扮好期待再頂硬上。至於係邊套戲？Anne姐就冇提到。不過好笑嘅係，多年後安夏菲慧上咗位，都係有八卦新聞話佢難搞……
算唔算係metoo事件？安夏菲慧即刻兜，話以Y2K後嘅電影行業慣例嚟講算係正常，而且唔係有大粒佬逼佢做，亦冇人想令佢難堪，而且而家大家會知道點樣處理得好啲。
作為監製兼女主角，Anne姐話The Idea of You都有搞試鏡搵男主角。套戲講安夏菲慧飾演嘅40歲單親媽咪，同細佢16年嘅偶像小鮮肉撻著，故此都要邀請唔同男演員俾Anne姐「點燈」……可能有過當年嘅經驗，安夏菲慧話劇組要求男演員以偶像小鮮肉角色嘅口味揀一首歌，然後要帶動安夏菲慧同佢跳舞。結果導演相中早排拍過西洋BL劇Red, White & Royal Blue嘅Nicholas Galitzine做男主角。
更多電影文章
電影LOL 周五電影快報︳Netflix老細保證內容「重質重量」／馬田史高西斯拍唔到歌王傳記片係因為…／荷里活工潮過後 影視行業開工量減少
電影LOL︳奇洛李維斯聲演《超音鼠3》 做反派 仲有3套新片在手 有冇時間結婚？
電影Rust道具槍走火射殺女攝影師案件 劇組槍械專家被判監18個月
電影LOL︳《美帝崩裂》成淡市票房冠軍 出品獨立片廠A24有力挑戰影壇巨企
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
