電影LOL︳觀眾陰影太大? One Piece拍真人版 造型照曝光已經有負評

·3 分鐘文章

連載超過 23 年的日本人氣漫畫One Piece早前宣佈拍成真人版,雖然出品公司Netflix製作費充足,作者尾田榮一郎又好興奮咁不停喺自己twitter更新真人版進度,而且多次表示極期待真人版,不過一眾漫畫迷及觀眾完全另一種反應,對真人版完全無信心!

觀眾有咁嘅反應都好正常,因為漫改電影好難拍得好睇,日本自己拍都出事,好似《進撃的巨人》、《二十世紀少年》等,不過至少造型還原度極高,戲唔好睇但劇照海報夠哂靚。由美國改編日本動漫嘅真人版,無論劇集或電影暫時未諗到邊套見得人,多年前嘅《龍珠》至近少少嘅《死亡掣記》都驚嚇度十足,嚇到依家都未平復!

One Piece真人版劇集第一季暫定有10集,今日Netflix公布真人版其中5位選角,男主角「路飛」由笑容燦爛少少傻氣嘅墨西哥演員Iñaki Godoy飾演,18歲嘅佢曾經喺另一套Netflix出品墨西哥劇集Who Killed Sara演出。「烏索普」則由客串過美劇《醫人當自強》嘅黑人男星Jacob Gibson飾演。

廚師「山治」將由英國男星Taz Skylar飾演,而「卓洛」則由新田真劍佑飾演,佢暫時係名單上唯一亞裔主演。新田真劍佑有多次演出漫改電影經驗,喺日本拍過《浪客劍心》真人版電影,近年轉投荷里活發展,因為美國長大講到一口流利英語嘅佢成為美版漫改御用演員,啱啱先拍完真人版《聖鬥士星矢》,依家又做「卓洛」!

而好多人鍾意cos、性感到噴血嘅「娜美」則由Emily Rudd飾演,曾經主演Netflix劇集Fear Street系列及美劇Hunter嘅Emily本身係動漫迷,對於可以參與One Piece表示開心及勞幸!Emily夠靚女,不過身材同娜美嘅火辣有大段距離,唯有等睇造型照先知佢可以有幾「娜美」!

5位主角身穿由尾田榮一郎為劇集設計嘅Tshirt拍片,雖然位位青春可人不過零造型下,同漫畫角色無忽似,消息一出當然一片負評!有時觀眾負評又未必關哂外型事,以One Piece為例,「卓洛」成日口咬一把刀、手攞兩把刀、「娜美」好身材又著得清涼,漫畫平面睇好有型,變成真人做就違反人類生理結構,睇落怪怪地。

而且One Piece仲有食惡魔果實得到唔同特殊能力嘅情節,又有橡皮手,加上其他巨人、魚人等種族,電腦特效做得唔好真係一秒出戲,似睇B級騎呢笑片!

更多電影文章

電影LOL.今期睇咩戲︳永恆族/今敏:造夢大師/消廢者聯盟

電影LOL︳BL劇《只因我們天生一對》電影版 12月香港上映

電影LOL︳台灣視后賈靜雯壓陣 《瀑布》揭母女疫情下困獸鬥

電影LOL︳神奇女俠Gal Gadot演《白雪公主》魔后 網友大呼選角錯晒!

電影LOL︳新一代邦女郎安娜迪艾瑪絲變影壇搶手貨 傳接拍殺神John Wick外傳

電影LOL︳80年代港產片浪潮重要人物 新藝城主腦石天逝世

電影LOL︳迪士尼拍《波西傑克森》美劇 原作者親自執筆費事電影版又爛尾

按此下載 全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能