雅虎香港新聞 【香港字體】傳承「寫字佬」貼地招牌字 「李漢港楷」一體成型充滿民間智慧
【Yahoo 新聞・香港字體系列報道】「李漢港楷」是鮮有以人物命名的香港字體。「我鍾意玩食字嘛，有種『你看香港嘅楷書』，同埋『看香港嘅街道』嘅意思」，負責修復這款字體的造字師、48歲李健明如是說。李漢是「寫字佬」，生前作品多見於小店招牌，拼湊出香港老街道的靈魂。李健明則是「招牌佬」的兒子，與李漢是街坊街里。這段淵緣成就大李漢港楷的誕生。
當「招牌佬」遇上「寫字佬」
故事回到七十年代，李健明記得，「招牌佬」爸爸每造一塊招牌就找人寫字，「最常見嘅係楷書，文化機構會用隸書，髮型屋就會用行書，比較靈活跳脫，所以每個寫字佬都識寫幾種字體」。
「雖然大家都係姓李，但其實完全無親戚關係！」那時李健明在爸爸的招牌店做「跑腿」，「爸爸會叫我去搵李伯伯寫隸書，要幾多幾多吋高」。那些年，香港一街寫字佬，父親唯獨與旺角小巷擺檔的李漢熟絡，「爸爸話李伯伯幾好傾，又會肯幫人趕貨，其他大名氣啲嘅可能都有啲藝術家脾氣，佢哋仲會一齊去佛寺」。
九十年代，李伯伯準備「收筆」，卻對這位招牌佬念念不忘，「佢擔心阿爸啲招牌無人幫佢寫字，或者驚佢做出嚟嘅招牌唔同咗樣，就係心入面掛住」。於是李伯伯抄字典留下大批字稿，但只完成字典前半部，「唔知係咪身體唔好無寫到，仲有另一啲字稿係爸爸儲落」。集腋成裘，共留低約2,000字的字稿。
台字體公司受感動 免費製電腦字
李健明遂將字稿變成電腦檔，「我諗住自己用，唔好辜負咗李伯伯一片苦心」，怎料放到facebook與朋友分享後廣為人知。他後來聽電台得知有台灣公司可將手寫字變成電腦字體，遂花約一年時間整理字稿，拼湊出3,000多個常用字。該台灣公司得知李伯的故事深受感動，免費為他將手稿化成電腦字。2020年，李為字體發起眾籌130多萬元，並發行全套約8,000字的「李漢港楷」。
提到招牌字，老一輩或會想起北魏體，李認為李漢港楷比北魏更具中庸之道，「以前區建公嘅北魏都幾上流社會，係大商號用，李伯係代表咗某種貼地，可能未必有北魏咁有特色，但你會覺得好熟面口，成日喺你身邊咁」。街坊小店、粥麵舖均會使用這款字體，近年亦有製作花牌的公司採用，適合傳統、莊重場合。他形容，李漢港楷雖然勾比北魏小，但同樣較粗身，「香港（環境）太密集，如果太幼身會睇唔到，以前做太幼嘅話會畀人鬧」。
「一體成型」招牌字藏傳統智慧
李伯的行筆暗藏獨特民間智慧，大部份字均是「一體成型」，例如「通」字的辵部首一筆而成，只為便利招牌製作，「如果我落字嘅時候分開幾部份，我話痴得啱，個客話唔啱已經有排拗，或者我帶漏咗一點去，咁就死得。呢啲係電腦字唔會考慮嘅嘢，傳統智慧應該要傳承落去」。
李健明從小接觸字體，認為香港萬字俱備，只欠保存，「以前舊報紙有好多手繪美術字，但睇完就無咗；工廠好多舖頭塊招牌唔爛都唔會換，但街市可能轉咗手就會拆走」。李笑言希望設計師「亂用」其字體，「以前香港街招貼到亂晒籠，李漢、北魏、九龍皇帝都係香港景象一部份。有好多人話呢隻字應該用落乜嘢乜嘢，我覺得唔好將啲字定死，例如『哈哈笑按摩』用李漢唔知會點呢？亂咁用字體就已經代表香港，就睇吓呢隻字體可以行到幾遠」。
【香港字體系列報道】
