雅虎香港新聞 【電影LOL】《毒魔》開畫北美大收 仲有機會加入Marvel宇宙？
由湯哈迪（Tom Hardy）、活地夏里遜（Woody Harrelson）、Michelle Williams、Naomie Harris等人主演嘅《毒魔：血戰大屠殺》10月1日於北美地區上映。雖然片期改完又改，亂到宣傳都做唔切，不過一樣大收，北美首個周末錄得9010萬美元票房，仲高過《黑寡婦》嘅8080萬美元開畫紀錄，成為新冠疫情以來北美最高開晝票房電影！
之前《毒魔》導演Andy Serkis接受《IGN》訪問時派哂定心丸話同「蜘蛛俠」合作係遲早嘅事，男主角Tom Hardy唔止一次提到希望加入漫威大家庭，期間又製造唔少煙幕，好似不經意咁將戴住《蜘蛛俠：不戰無歸》帽嘅相post上社交媒體，吊足大家胃口！
－－－－－下面有《毒魔：血戰大屠殺》劇透－－－－－－－
隨住電影於北美上映，網路當然劇透不斷，最多人講包括片尾當Eddie同毒魔本來喺酒店房睇電視，突然齊齊被傳送到另一酒店，電視畫正在播放J. Jonah Jameson（J.K. Simmons飾演）報導「蜘蛛俠」真正身份嘅新聞！呢幕咪係《蜘蛛俠：決戰千里》劇情？！
－－－－劇透完畢－－－－
就咁睇都知「毒魔」同「蜘蛛俠」將來一定會同場，身為漫威劇透王嘅Tom Holland就喺自己ig出story恭喜《毒魔2》上畫兼補多句「傳聞有幾真」（Are the rumours true)。「蜘蛛俠」嘅傳聞極多，Tom Holland指邊樣先？「毒魔」會喺《蜘蛛俠：不戰無歸》出場，定係「蜘蛛俠」喺《毒魔3》現身呢？
不過可以肯定12月上映嘅《蜘蛛俠：不戰無歸》將會開啟多重宇宙，因為奇異博士施咒而令幾個時空交錯，Tom Holland講嘅傳聞會唔會係指幾代「蜘蛛俠」同場出現？第2代「蜘蛛俠」Andrew Garfield近日受訪時就話自己無份演出，不過MCU一向好叻賣關子，一日未睇到套戲，一日都未知3代「蜘蛛俠」會否同場演出！
《毒魔：血戰大屠殺》片尾話俾大家知，就算不同電影公司各自手握角色版權，最後佢咃都會加入漫威呢個大家庭，據聞Sony旗下嘅反派角色《魔比煞》及Kraven the Hunter都會陸續加入MCU，睇少套都跟唔到漫威宇宙條故事線！
《毒魔：血戰大屠殺》香港10月13日上映。
更多電影文章
【電影LOL】今期睇咩戲 007：生死有時 / 安雅與魔女 / 電影之神
【電影LOL】拍到片商要賣盤 《007：生死有時》堅持戲院放映有回報 有望打破《復仇者聯盟4》開畫紀錄
【電影LOL】鄭保瑞8年新作《智齒》chur盡主角 林家棟：係攞命拍法！
【電影LOL】亞洲電影節港產片名單好吸引 《12夜》姊妹作《12日》楊潮凱執導sheshe片《喜歡妳是你》
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載
