雅虎香港新聞 【電影LOL】《迷幻列車》外傳拍電視劇 「巴閉」做主角
90年代英國電影《迷幻列車》(Trainspotting)即將開拍「巴閉」外傳！由1996年金像導演Danny Boyle執導、改編自Irvine Welsh同名小說，拍出4個蘇格蘭愛丁堡青年沉溺毒品、酒精、暴力、性愛嘅糜爛生活，大膽題材及爽快鏡頭令《迷》成為經典！
續集《迷幻列車2》相隔20年於2017年推出，幾位青年變哂做中佬，無咗青春嘅佢哋生活依然混亂，仍然與毒品為伍，不過幾位主角唔再得友情咁簡單，多咗背叛、報仇以及走唔出困境，不停重覆犯錯嘅無力感。多咗家庭負擔嘅中佬，面對人生選擇題一樣難以落決定。
電影一、二集延續主要角色發展，原著作者Irvine Welsh講過希望可以藉一眾主角未太老時開拍《迷幻列車3》。系列小說一共有5部，分別為Trainspotting (1993)、續集Porno(2002)、Dead Man’s Trousers（2018）以及2部前傳Skagboys (2012)、The Blade Artist(2016)。故事寫好，要拍第3集未必無可能。
《迷》個個咁有性格，二十年期間發生過嘅事一定引人入勝，《迷3》未確定開拍前，可以睇住系列外傳先！飾演「巴閉」（Begbie）嘅Robert Carlyle近日接受NME訪問時透露，現正同Irvine Welsh合作與幾位倫敦製作人洽談，著手改編以「巴閉」為主角嘅小說The Blade Artist成為迷你劇！
Carlyle提到計劃處於初步籌備階段，The Blade Artist故事同《迷幻列車》交織，主要講「巴閉」嘅瘋狂事蹟，包括佢嘅前塵往事，以及依家改過自身同太太、兩個女兒於加洲生活嘅現況。
因為「巴閉」發生太多事，加上故事橫跨20年、涵蓋愛丁堡及洛杉磯兩地，電影篇幅唔夠講。為咗保留小說嘅精粹，現階段計劃拍成六集每集一個鐘嘅迷你劇。Carlyle透露佢哋密密商討中，希望明年可以落實「巴閉」回歸大計。
更多電影文章
【電影LOL】今期睇咩戲 007：生死有時 / 安雅與魔女 / 電影之神
【電影LOL】拍到片商要賣盤 《007：生死有時》堅持戲院放映有回報 有望打破《復仇者聯盟4》開畫紀錄
【電影LOL】鄭保瑞8年新作《智齒》chur盡主角 林家棟：係攞命拍法！
【電影LOL】亞洲電影節港產片名單好吸引 《12夜》姊妹作《12日》楊潮凱執導sheshe片《喜歡妳是你》
【電影LOL】《毒魔》新片突然提早10月上畫 出呢招暗示會同蜘蛛俠合作？
【電影LOL】型男小田切讓首部自編自導自演日劇 親身上陣扮爆粗警犬
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載
