雅虎香港新聞 【回顧2020．娛樂】英電影雜誌票選年度最佳50部電影 《天能》都係排38 三甲好有文青feel
英國電影學院BFI創辦嘅電影雜誌Sight and Sound，搵嚟全球過百位影評人投票選出年度最佳50部電影。入圍電影不限於戲院上映，曾於影展放映或串流平台播映嘅亦列入投票範圍。今年因為新冠疫情關係，各大影展相繼延期甚或規模縮少，仲有大量電影要延後上映日期，所以今年票選有一定難度！
榜上不乏商業電影，其中由Elisabeth Moss主演嘅驚慄片《隱形客》及評價好壞參半嘅《猛禽暴隊：解瘋小丑女》分別佔據第48及43位。《猛》以小丑女等全女班上陣，當中瘋狂又活力十足，令人興奮甚得影評歡心，評價高過奇連伊士活執導，真人真事改編嘅《李察朱維爾：驚世疑案》（47位）。
今年年度搵錢大片《天能Tenet》亦有上榜，排名38，主要因為《天》不停向前、倒退嘅動作場面非常震憾！獲得奧斯卡多個提名，由Greta Gerwig執導嘅《小婦人》排名29，好評集中於導演改編文學經典嘅功力，通過跳躍時序描寫4姊妹由女孩轉大人嘅心路歷程，飾演Amy嘅Florence Pugh亦獲得高評價，表演搶眼！
睇哂成個片單，Netflix出品今年成為大贏家，分別有David Fincher執導、影帝Gary Oldman主演嘅Mank（第34位）、Sarah Garron執導英國電影Rocks（第9位）、Kristen Johnson執導Dick Johnson Is Dead（第6位）及《無痛失戀》編導Charlie Kaufman執導嘅《我想結束這一切》（I’m Thinking of Ending Things）得到第4位。
《我》故事開始一名女子與拍拖數周嘅男友開車前往探訪男方父母，而女生於車程中內心不斷自言自言「男人人品唔錯，但我想分手」等，到達男家時見到農場凍死嘅羊、被蛆蟲啃咬嘅豬以及男方父母，樣樣都怪怪，乍看以為係愛情片，睇埋落去先發現原來有扭橋。《我》完場令人唏噓，不過因為劇情走向令電影得到廣泛討論！可惜，因為Kaufman前作成績不佳，所以佢決定《我》之後唔再執導演筒，專心做編劇！
50部電影中亞洲電影或亞裔導演作品唔多，分別有是枝裕和執導，嘉芙蓮丹露、茱麗葉庇洛仙主演嘅法語電影《真實芳言》；韓國洪尚秀導演、金敏喜主演嘅《逃亡的女人》，導演戲下與金敏喜搞不倫戀，於南韓遭受非議，近乎絕述，電影與真實生活有幾分重疊。台灣導演蔡明亮《日子》被票選為最佳電影第10位，成為片單上唯一華語片。電影於男主角李康生中風受病痛困擾期間拍攝，戲內更出現蔡導陪李康生針炙治療畫面，真真假假之間拍出時間流逝嘅真摯。
華裔女導演趙婷執導，Frances McDormand主演嘅Nomadland獲選為年度第8位電影，影片改編自同名小說，講述一個60歲婦人於經濟倒退嘅年頭失去一切，被逼過住穿州過省無以為家嘅生活。電影於今年第77屆威尼斯國際影展中獲得金獅獎殊榮，預定明年2月會正式上映。
今年三甲都有住人文關懷氣質，第3位係由女導演Kelly Reichardt執導、華裔男演員Orion Lee主演嘅First Cow，19世紀美國俄勒岡州一名華人與一位廚師，帶著一頭牛闖蕩嘅經歷；第2位係Sundance電影節獲得最佳導演嘅黑白紀錄片Time，講述黑人白手興家婦女點樣營救因為打劫銀行被判監60年嘅丈夫。而年度最佳就係《被奪走的十二年》導演Steve McQueen嘅電視電影Lovers Rock，以80年代倫敦西區為背景，發生於一對黑人情侶嘅浪漫故事。
每個人對電影都有不同喜好，Sight and Sound嘅年度片單未必合你心水，不過作為參考算非常全面，名單包括丹麥、印度等多地電影作品，啱哂影迷超住片單逐套搵嚟睇。
Sight and Sound票選2020年度十佳電影名單：
10 蔡明亮－《日子》
9 Sarah Garron －Rocks
8 趙婷－ Nomadland
7 Eliza Hittman－ Never Rarely Sometimes Always
6 Kirsten Johnson－ Dick Johnson is Dead
5 Rose Glass －Saint Maud
4 Charlie Kaufman－ 《我想結束這一切》
3 Kelly Reichardt－ First Cow
2 Garrett Bradley －Time
1 Steve McQueen －Lovers Rock
更多電影文章
【電影LOL】因新冠肺炎病逝 三大影展得獎大導 金基德重要作品回顧
【回顧2020．娛樂】2020全球搜尋量最高十大電影 《上流寄生族》居首
【電影LOL】三代蜘蛛俠蜘蛛女新版《蜘蛛俠3》碰頭 八爪博士再現
【電影LOL】明年新片戲院網上同步上映惹非議 華納得罪《天能》導演 伙伴擬入稟阻撓
