雅虎香港新聞 【電影LOL】明年新片戲院網上同步上映惹非議 華納得罪《天能》導演 伙伴擬入稟阻撓
早幾日先提到，手揸一副好牌嘅片商華納，打算將明年上畫嘅電影，安排喺戲院及屬下串流平台HBO Max同步上畫，以免疫情影響收入渣都冇得剩。聽落好破格，但係話口未完已經有反對聲音。
首先出聲嘅係華納合作多年嘅《天能》大導演Christopher Nolan。「老蘭」向來鍾情大銀幕，今年《天能》映期受疫情影響一拖再拖，導演堅持喺戲院上畫，因為想撐一撐戲院業界朋友。而且近年Christopher Nolan作品規模龐大，又真係要用大銀幕配合一流音響效果先睇得夠爽。
「老蘭」就華納嘅決定向外媒Hollywood Reporter發聲明，明寸HBO Max唔掂，話同華納合作嘅大導演大明星，一夜之間就發覺自己嘅心血俾人掟上個最差嘅平台。Nolan又話呢個決定毫無經濟效益，求其喺華爾街搵個才俊都知咩事。
而有份投資拍攝《沙丘瀚戰》(Dune)以及《哥斯拉對金剛》（Godzilla Vs Kong）嘅電影公司Legendary，更加決定出律師信阻止新片喺串流平台上映。Legendary喺《哥斯拉對金剛》負責75％成本，但話事權落喺華納手上，當Legendary高層一朝早聽到咁突然嘅消息，難怪著晒！另外2間同華納合作嘅公司Village Roadshow 同Bron據報都可能透過法律程序同華納死過。
根據Hollywood Reporter報導，呢單嘢係華納營運總裁Carolyn Blackwood 拍板，過得好倉卒，結果得罪成村人。行內人話，而家華納等緊對手迪士尼表態出年都係會戲院＋線上同步放映新片，不過見到咁大個大頭佛，迪記梗係唔會自投羅網啦！
更多電影文章
【電影LOL】Monster Hunter電影版 因為MC Jin 一句對白被指「辱華」要立即落畫
【電影LOL】男神Benedict搭影后Jodie Foster The Mauritanian踢爆美軍不人道一面
