文雪兒爆TVB女藝人爆粗鬧前輩 對戲時惡言相向「關你X事」

喺《異空感應》飾演陳家樂媽咪嘅文雪兒，原來剛剛同TVB完約。早前文雪兒接受媒體訪問，提到2018年重返幕前加入TVB嘅經歷，盛讚新一代藝人好多都有禮貌，甚至鞠躬打招呼，但亦得知有位姐仔居然向前輩爆粗！

文雪兒提到有位同佢同輩嘅演員朋友透露，早幾年喺TVB拍劇期間，同一位年青女藝人做對手戲，該位演員提出建議點樣可以演好場戲，點知嗰位女藝人同前輩講「關你X事」。文雪兒話佢有向朋友了解係邊個爆粗，對方不欲開名，但就提到該年青女藝人已經離開TVB。文雪兒認為，該女藝人如果用咁嘅態度，對「想你好」同埋「大家想多啲交流」嘅前輩都咁，嗰位女藝人應該唔太適合做呢行。

文雪兒另外都有提到試過要拍需要感情嘅戲份時，現場有藝人嘻嘻哈哈開玩笑，好影響鏡頭前嘅演員，但同場嘅前輩「教訓」完之後已經有所收歛。而後輩當中，文雪兒點名稱讚姚子羚。

1976年入行嘅文雪兒，三家姐原來係周星馳電影《功夫》入面飾演包租婆嘅元秋。當年文雪兒考入佳視，有功夫底子嘅元秋更陪伴妹妹拍打戲。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！