演員變老千呃7億美金 荷里活最大龐氏騙局將拍成紀錄片︳電影LOL

喺美國開設私營動物園嘅話題人物Joe Exotic，因為被控買兇殺妻罪成而被判監。導演Rebecca Chaiklin將呢個故事拍攝成紀錄片Tiger King，反應不俗仲一開三季。而Rebecca Chaiklin新作Hollywood Ending同樣係犯罪紀錄片，已經被Amazon MGM買入版權。

Hollywood Ending嘅故事主人翁Zach Horwitz曾經係演員，幕前演出未必多人識，但演技一定有返咁上下。因為佢經營嘅「龐氏騙局」，足足cap咗7億美金，係荷里活史上最大單！

Zach Horwitz早年以藝名Zach Avery出道，佢喺2014年開始同投資者兜售聲稱同Netflix、HBO等串流大台合作嘅節目版權，強調高回報。Zach Horwitz唔止「做戲」叻，喺呢場騙局入面連編劇道具都撈埋，佢偽造合同、假扮娛樂公司覆電郵等，真係幕前幕後一手包辦。

收到錢之後，Zach Horwitz將佢用嚟還利息比上一批投資者，當然仲會過水濕腳豪洗一番啦，豪遊之外仲喺洛杉磯買咗幢價值6百萬美元大宅。十個煲九個蓋，爆煲都係遲早問題，到2021年開始有投資者發現收唔到錢，Zach Horwitz因詐騙等罪名被FBI拘捕，2022年被判入獄20年，仲要賠返2億3千萬畀受害人。到底點解咁多人落搭？Zach Horwitz點樣sell到投資者？唔駛留意《東張西望》，睇Hollywood Ending應該會有答案。

電影同劇集以外，串流平台Amazon Prime都知道紀錄片亦係觀眾喜愛內容之一，所以今年有唔少大型紀錄片即將上架。Amazon Prime早前推出咗女畫家Frida Kahlo嘅生平紀錄片，上星期再推出另一套以美國海軍為題材嘅The Blue Angels，下個月仲有傳奇天后紀錄片I Am: Celine Dion。

更多電影文章

魔胎／詭異之家／隊冧全世界／子承父孽︳電影LOL 今期睇咩戲

《職業特攻隊8》隨時再延期 因為2.3億元潛艇壞咗︳電影LOL

張藝謀失手之作《長城》登上Netflix十大 主角麥迪文話「套戲爛到連個女都串我」︳電影LOL

Pixar傳裁員14％ 減少原創串流內容推翻前老細方針？︳電影LOL

許冠文黃子華32年來首度合作新片《破．地獄》 唔搞笑講生死︳電影LOL

《九龍城寨之圍城》內地票房衝破5億人民幣 爬頭力壓主旋律片《維和防暴隊》︳電影LOL

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！