許軼Day＠ COLLAR今年單飛發展？隊友Marf邱彥筒口快漏風聲被封「爆爆王」

女團COLLAR 7位成員當中，Marf邱彥筒、Winka陳泳伽（Winka）及李芯駖（芯駖）都已經先後單飛推出個人作品。新一年開始，COLLAR係咪再有隊員出solo？本來冇咩聲氣，但係尋日COLLAR 嘅Marf同Day（許軼）一齊出席活動，受訪時有人漏口風！

Marf同Day接受圍訪時，記者問到Marf點解會現身早前商台嘅賀歲波足球賽，Marf就話自己去做工作人員，又突然拍住隔離嘅Day話「我都有自薦幫佢個MV拍BTS（behind the scene, 製作花絮)，Day立即表情凍結。有記者聽到破綻就即刻問Day「你有歌咩？拍MV？」，Marf即刻hang機唯有話「唔知呢」，Day就望實Marf唔知點算……唔，明架啦，大家等聽歌啦！

COLLAR fans睇到訪問片段都相當激動，因為終於等到Day單飛嘅一日，同時都覺得Marf唔覺意爆料相當好笑，仲封佢係COLLAR嘅爆爆王。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！