迪士尼鼓吹政治正確捱批 動畫導演鬧真人版《小魚仙》本末倒置︳電影LOL

近年西方社會鼓吹大愛共融政治正確，作為片商嘅迪士尼就「用作品說話」，近年唔少出品都一改過往被指「太白」嘅設定，以不同族裔嘅人做主角，例如《熊抱青春紀》(Turning Red)主角係加拿大華裔第二代、《奇幻魔法屋》故事發生喺哥倫比亞山區。另外迪士尼亦放膽加入多元性向設定，旗下Marvel超級英雄片中出現同志角色等。

開放多元唔係壞事，但觀眾buy唔buy又係另一件事。去年上畫嘅真人版《小魚仙》起用黑人女星Halle Bailey就備受批評，加上片中女主角Ariel嘅一眾家姐咩膚色都有，的確好世界大同，但亦令人思疑佢地爸爸King Triton點解可以有6個唔同族裔嘅女……

曾經為迪士尼執導動畫電影《阿拉丁》、《魔海奇緣》等作品嘅John Musker，喺西班牙出席活動時向記者表示，迪士尼有需要修正現時創作方針，重新畀娛樂性、故事同角色行先，訊息居次。John Musker指出，迪士尼好多經典本身都冇指定要帶出嘅訊息，務求令觀眾投入其中先係中心方向，而John亦強調唔係要迪士尼放棄有意義嘅議題，但要首先要有令人有代入感嘅角色。John批評真人版《小魚仙》重心應該係King Triton同Ariel嘅關係，但係套戲冇著墨於此。

呢番話由John Musker講零舍有份量，因為佢2009年為迪士尼封導嘅動畫片《公主與青蛙》，片中公主設定為黑人，當時評價好壞參半。John Musker而家講返套戲，話當年嘅設定唔係要政治正確，而佢亦明白外界點解有批評。

如果以票房計，真人版《小魚仙》全球票房接近5.7億美元，相對2.4億成本計，唔算大賺但應該唔使勁蝕。嚟緊迪士尼嘅《白雪公主》由有拉美血統嘅Rachel Zegler演白雪公主之後受盡批評﹐而Rachel表明唔欣賞1937年原版《白雪公主》更令佢再被人鬧多兩錢。而家唔少花生友都等緊套戲下年宣傳時Rachel Zegler會唔會又出事，同埋睇實套戲票房收幾多。如果都係仆的話，相信唔駛導演提醒「迪士尼電影要娛樂性、故事同角色行先」，高層都會識點做。

更多電影文章

芙莉歐莎：末日先鋒傳說／查無此人／小菊的世界／讓我們酒在一起／末路狂花錢／平行天空下︳電影LOL 今期睇咩戲

張藝謀失手之作《長城》登上Netflix十大 主角麥迪文話「套戲爛到連個女都串我」︳電影LOL

Pixar傳裁員14％ 減少原創串流內容推翻前老細方針？︳電影LOL

許冠文黃子華32年來首度合作新片《破．地獄》 唔搞笑講生死︳電影LOL

《九龍城寨之圍城》內地票房衝破5億人民幣 爬頭力壓主旋律片《維和防暴隊》︳電影LOL

蜘蛛仔湯賀蘭與黑人女演員合演《羅密歐與茱麗葉》被指唔襯 網民︰好似拳手互睥 ｜電影LOL

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！