鄧兆尊爆爸爸新馬師曾生前愛賭錢 曾一晚輸掉400萬：十幾廿層樓

日前（17日）播出一集嘅網上娛樂節目《娛樂好好玩》繼續大談圈中熱話及大爆秘聞，期間講到早前網絡瘋傳某位頂級一線男星喺澳門著名賭場貴賓廳連續豪賭七天，結果輸咗高達10.3億元，甚至要抵押豪宅及私人飛機還債，喺消息傳出後唔少網民都估係邊一位男星，不過經公安部網安部門調查後，證實係有網民為咗博取流量而使用AI製作謠言引起。而嘉賓主持鄧兆尊就大爆爸爸新馬師曾（鄧永祥）生前都試過豪賭，仲喺一晚間輸咗400萬。

喺節目中，吳家樂好奇問娛樂圈中邊個鍾意賭錢，鄧兆尊就回答：「上一輩應該好多」，而江美儀就話：「一定係曹達華啦首推，成間片場都冇咗囉」，之後吳家樂就話要問鄧兆尊，因為佢爸爸新馬師曾（鄧永祥）都鍾意賭錢，鄧兆尊直認爸爸鍾意賭錢：「以前我小朋友嗰時，我哋喺佢房嘅床度見過一疊疊500元紙幣，圍住鋪床，即係一個U字型咁圍住張床，咁你諗下嗰棟嘢有幾多錢呢？我嗰陣時細個唔識分，總之好大棟，高過個電話啦！...但只係維持咗一晚啫，第二晚冇晒啦！」之後吳家樂問：「咁你有冇問爸爸個U字型…」，跟住鄧兆尊話：「唔好提！唔好問！唔好提！」並搞笑扮爸爸當時嘅翻白眼表情。

鄧兆尊表示爸爸當年鍾意賭牌九，唔清楚佢喺邊度賭，只係知道一晚就冇晒啲錢。吳家樂再問佢估計嗰度大概有幾多錢，鄧兆尊就話：「我諗一棟起碼廿萬，一疊咁厚啦，呢度都起碼20個一萬啦，廿萬啦起碼冇得走㗎喇。嗰陣時一棟可以買一層樓㗎喇，總之就係嗰度有十幾廿個啦。」換言之即係起碼有400萬。

之後鄧兆尊再話自己有幸與曹達華拍戲，並向佢問及輸掉片場一事，原因就係：「因為佢哋嗰個年代係冇乜娛樂嘅，放工一係去賭，一係去夜總會跳吓舞，係冇第二種娛樂㗎啦！咁佢（曹達華）就去賭，佢話我係香港唯一一個得到何生畀張VIP卡我去任食任住嘅，咁你諗下佢輸幾多」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！