雅虎香港新聞 【電影LOL】劉亞仁增肥33磅寒背扮啞仔 Voice of Silence 演低下階層幫黑幫收屍
南韓最年輕青龍影帝劉亞仁及劇集《梨泰院Class》「張會長」劉宰明合作新片Voice of Silence （台譯：《收屍人》）於疫情淡季開出好成績，上映10日錄得30億韓幣佳績。呢套充滿黑色幽默嘅幫派電影，講述日間賣雞蛋、同時接受犯罪組織委託嘅泰仁（劉亞仁 飾），同埋昌福（劉宰明 飾）以協助收拾黑幫行私刑後嘅屍體維生。
某日，兩人收到經常合作的犯罪組織室長永錫的委託，將被誘拐的11歲女孩楚熙託付給他們。然而隔天，泰仁與昌福打算將女孩帶回給永錫時，竟發現永錫已身亡，無奈之下成為綁架犯幫兇，泰仁將女孩帶回鄉下家中，昌福則負責收取贖金，可惜途中失足致死。泰仁按原訂計劃將女孩交予人口販子，卻因為同女孩培養出感情而將佢救回，事件越演越烈……
《收》係黑幫故事但並無槍林彈血嘅打鬥場面，但比血腥場面更心寒嘅係，戲中泰仁及昌福同為傷殘人士，昌福因為腳有事，而由佢照顧長大嘅泰仁就唔識講嘢。兩位主角屬於社會低下階層，只能做下流工作甚至被要求做綁架幫兇時亦無力反抗！劉亞仁飾演嘅泰仁遲鈍無表情，一上車就瞓覺，道出因為貧困而道德麻木，過住只為生存嘅機械生活。
電影之所以引起韓國廣泛討論，因為難以用非黑即白嘅道德觀判斷戲中各人。昌福信主但幫黑道做嘢，埋屍時總會禱告頌經，同時迷信風水又打算背叛泰仁夾帶私逃； 泰仁因為貧困及要照顧年幼親妹，見盡黑幫私刑，對別人生死無感只為賺錢，但為保護女孩奮不顧身； 女孩當正佢咃係一家人仲幫手埋屍，甚至依賴泰仁嘅保護，可是一見到自己學校老師，即時背叛泰仁，逼泰仁落荒而逃。佢咃係好人定壞人？有別以往幫派電影，《收》留下空間俾觀眾思考引發好口碑。
一向以型男形象示人嘅劉亞仁為角色增肥15公斤，總係垂低頭少少寒背，以表現泰仁於社會中地位低下、經常卑弓屈膝嘅形象。不過最高難度應該係全片零對白，只靠身體神情演戲！劉亞仁話因為飾演泰仁而失去咗背對白嘅能力，由於表現出色，韓國觀眾盛讚劉再創「人生角色」！《收屍人》會唔會為佢再次帶嚟青龍影帝殊榮？
更多電影文章
【電影LOL】涉抄襲15年後終認衰 串嘴才子郭敬明新片《晴明集》受拖累臨時落畫
【電影LOL】2020香港電影票房急跌7成 《乜代宗師》《天能》成年度中西片票房冠軍
