雅虎香港新聞 【電影LOL】Netflix正嘢History of Swear Words 眾星名正言順爆粗
2020年衰到無朋友，真係要大大聲講粗口送佢走，不過講粗口又易惹人誤會，要知道太多人只睇表面，嫌棄滿嘴粗言穢語但又唔介意斯文敗類！今次Netflix有好嘢，1月5日推出一套5集紀錄片－History of Swear Words（意譯：粗口的歷史）。
呢套紀錄片集教育與娛樂於一身，搵嚟What the F作家Benjamin Bergen、Holy Sh*t: A Brief History of Swearing作者Melissa Mohr、言語學家Anne Charity Hudley、專門研究女性主義相關題目嘅學者Mireille Miller-Young講解語言嘅歷史，好似人人皆知嘅F字粗口源於古時行房要得皇帝批准，要掛埋張批文「Fornication Under Consent of the King」喺門口，F字粗口其實係張批文簡稱！
History Of Swear Words講明係喜劇類，正經知識之外仲請嚟大批串星、諧星包括聲演《無敵破壞王》兼棟篤笑藝人Sarah Silverman、MTV主持人Nikki Glaser、《義勇群英之毒蛇反擊戰》男星DeRay Davis、《小心幫忙》女星Patti Harrison等分享自己嘅粗口小故事，如何mean住搞笑又或者善用粗口發洩怒火又唔怕得失人！
雖然片集講嘅都係英文粗口，好似大家都識嘅F*ck、sh*t、 B*tch等字，不過入面進行咗個有趣小實驗，參加者分成2組，一組可以講粗口一組唔可以，兩組人分別將手放入零度冰水中睇下捱得幾耐。結果証明講粗口嗰組耐力遠遠超出唔講得嗰組，爛口原來有益身心，仲可以堅強意志！剩係呢part都值得為人父母、處於道德高地嘅人睇！
最正係套影集搵咗狂人影帝Nicholas Cage做主持，近年唔拍A級大片轉拍cult嘢反而仲好睇嘅佢，明明正正經經著套老西做主持，硬係覺得睇睇下會有血腥、暴力怪雞場面發生。不過單係預告一開首，佢仰天狂叫F*ck 8秒已經夠哂吸引力，即刻想睇！
廣東話粗言穢言嘅變化及用法，好似多過英文好多，幾時有套紀錄片解構廣東話粗口同歷史呢？話哂文化遺產嚟架喎！
更多電影文章
【電影LOL】《神奇女俠2：1984》逆市高收 《神奇女俠》鐵定拍第3集
【電影LOL】《色慾都市》Sex and the City復刻拍網劇版 索女會唔會變大媽？
