【電影LOL】《神奇女俠2:1984》逆市高收 《神奇女俠》鐵定拍第3集

·2 分鐘文章

《神奇女俠2:1984》雖然內地開畫成績不如預期,不過北美地區就錄得理想數字。受疫情影響下北美影院有限度營業,《神2》開得2100間戲院(大概係疫情前3分1數量)仍然錄得1670萬美元票房,成為今年最高開晝票房電影,遠高過9月上映、一樣由華納發行嘅《天能》935萬嘅成績!

華納自家串流平台HBOmax同日上映《神2》一樣錄得好成績,平台於今月初有1260萬活躍用戶,而據華納自己公布,差唔多半數用戶於上映當日喺平台睇《神2》,即係首日有超過630萬人睇過,破哂開台以來紀錄,仲超出華納自己嘅預期!

雖然美國院線非常不滿華納安排戲院串流平台同步上映嘅舉動,不過如華納高層Andy Forssell所講「現時疫情影響下,觀眾未能入戲院欣賞電影,我哋能夠提供多個選擇俾大家,一家人齊齊欣賞正面又令人振奮嘅《神2》係一件美好嘅事。」

見大家咁踴躍,就算未知最後《神2》收到幾多票房,電影公司已經落實開拍第3集,作為系列最終章。《神3》繼續由原班人馬Patty Jenkins執導、Gal Gadot主演,造型都試埋,暫時未知其他角色好似Kristen Wiig飾演嘅豹女、Chris Pine飾演「翻生」Steve Trevor有無得留低,不過肯定第3集會集中講神奇女俠所屬嘅亞馬遜族,將會有更多族人參戰維護正義。

Gal Gadot觀眾緣爆燈,憑「神奇女俠」一角紅遍全球,雖然系列即將完結,不過由佢飾演嘅「神奇女俠」會喺其他DC電影中登場。包括預計2021年於HBOmax登場,花費高達3000萬美元、由原導演Zack Snyder重新剪輯長達4小時嘅《正義聯盟》,新版會重新搞過後製同配樂,據聞一眾主角仲錄過新對白,同2017年上映版本會有好多出入,Snyder保証新版嘅世界觀完整又精彩得多!

卸任「神奇女俠」後嘅Gal Gadot同《神》導演Patty Jenkins將會再合作史詩式鉅製《埃及妖后》,繼續強勢同美艷!不過希望《神》系列完咗後,唔好又極速cast過個女星重啟一次!

更多電影文章

【電影LOL】《色慾都市》Sex and the City復刻拍網劇版 索女會唔會變大媽?

【電影LOL】Netflix新劇《三體》內地監製疑被毒殺身亡 分紅不勻動殺機?

【電影LOL】新片Minari講美國新移民 居然唔當係美國片 金球獎準則被狠批

【電影LOL】玉女無以為繼 Vanessa Hudgens拍聖誕賀節片殺出血路

【電影LOL】沙拉保夫性醜聞纏身 Netflix極速割蓆新片除名