【電影LOL】《色慾都市》Sex and the City復刻拍網劇版 索女會唔會變大媽?

華納影業進行大改組,加大力度谷自家串流平台HBOmax,為咗搶客重啟自家搵錢劇集《色慾都市》!《色》1998年首播以來於全球掀起熱潮,入面4個女人:作家Carrie、律師Miranda、藝術策劃Charlotte以及自己開公關公司嘅Samantha,談性說愛靚衫靚景曾經被廣大觀眾視為愛情聖經兼閏密範本,劇集做足6季到2004年大結局!

因為太受歡迎又太想知Sarah Jessica Parker飾演嘅Carrie同Mr. Big(Chris North飾)發展如何,所以2008年推出同名電影。接住劇集發展講2人終於結婚,點知因為受名氣所累,Carrie將原本溫馨低調婚禮發大至城中盛事,Mr. Big壓力下想悔婚,最後遲勁多先到婚禮現場!女主角當然發哂癲,佢班女姊妹又護住Carrie,盛事變醜聞,故事發展兜兜轉轉兩人終於結得成婚!

2008年電影版食住劇集餘溫,加上延續劇集發展,票房口碑都叫ok,2010再推出《色慾都市2》講4位好姊妹同遊阿聯酋就睇得人好尷尬。去中東拍戲想多啲異國風情,可惜出嚟效果似足不諳文化又唔尊重當地風土人情嘅大媽,最慘係故事無嘢好講,搞到呢班曾經自信、自主仲有腦嘅女主角變成貪威識食,除咗男人無其他話題嘅平凡中女,電影權威網IMDB更錄得4.5分低評分!

之後傳過話有計劃開拍第3集電影,令一眾影劇迷大為緊張,勁驚美好回憶再被摧毀,最後因為飾演Samatha嘅Kim Cattrall拒絕參演而擱置。點知近日美媒Deadlne透露華納決定重啟《色》,無咗Samantha一角都照拍,預定製作成迷你影集於HBOmax播放!

依家要安排Samantha下落,唔知會唔會將《色3》原本Mr.Big心臟病發身亡條戲軌轉落佢度?不過,可以肯定Kim Cattrall唔做Samantha一啲都唔難過,佢同女主角Sarah Jessica Parker不和多年,Kim喺各大訪問同自已ig都明講大家唔係朋友,加上佢認為角色已經無得發揮,再帶唔到啟發俾觀眾,所以先唔想再拍落去。

劇集面世至今都有20年,世界又真係變咗好多,女人又邊止得男人同Shopping咁少話題?希望重啟嘅《色》會好似Sarah Jessica Parker形容「與時並進」,話哂呢10年8載世界發生咁多事:#metoo、#blacklivesmatter,種族平權等等,唔多唔少都會影響身為專欄作家嘅Carrie Bradshaw嘅價值觀啩。如果唔係,昔日嘅女神淪為煩膠大媽,邊個想睇先?

更多電影文章

【電影LOL】Netflix新劇《三體》內地監製疑被毒殺身亡 分紅不勻動殺機?

【電影LOL】新片Minari講美國新移民 居然唔當係美國片 金球獎準則被狠批

【電影LOL】玉女無以為繼 Vanessa Hudgens拍聖誕賀節片殺出血路

【電影LOL】沙拉保夫性醜聞纏身 Netflix極速割蓆新片除名

【電影LOL】《神奇女俠2》票房失利 打鬥場面唔夠刺激 觀眾負評︰以為睇溫情小品