【電影LOL】涉抄襲15年後終認衰 串嘴才子郭敬明新片《晴明集》受拖累臨時落畫

·3 分鐘文章

拍過內地電影《小時代》及《爵跡》嘅導演兼作家郭敬明,終於肯為15年前抄襲一事道歉!擅長炒作話題嘅佢已經唔係第一次被爆抄襲,以往有作品推出期間,總會巧合地出現同製作團隊反面、旗下作家指責佢欺凌等負面新聞,往往以事情大逆轉或誠懇道歉,幫自己製造良好形象同人氣,間接令作品大賣。今次重操故技疑似失靈,因為佢最新導演電影《晴明集》,上映10天突然被落畫!

事緣郭敬明2003年出版《夢裡花落知多少》,與內地女作家莊羽嘅小說《圈裡圈外》多處雷同,2006年莊羽提告而法庭亦判郭抄襲,要賠20萬人民幣兼登報道歉。不過當年郭只肯賠錢唔肯道歉,等到2020年最後一天突然反省,喺自己微博出長文道歉話自己15年前「年少輕狂,不肯承認錯誤」,仲良心發現叫大家「拒絕抄襲,尊重創作」,仲會將《夢》嘅收益全數賠償予莊羽。

突然良心發現,相信同著名作家瓊瑤以及111名編劇、導演、製作人及作家聯合聲明,抵制郭敬明同一樣擅長炒作、攻撃抹黑嘅《延禧攻略》創作人于正有關。抄襲他人心血唔承認非常缺德,其他作家無郭、于兩人嘅名氣及財力無奈硬食,今次遇上有財有勢嘅瓊瑤阿姨,2個人終於跪低,平時串嘴嘅于正就2014年製作嘅劇集《宮鎖連城》抄襲《梅花烙》正式向瓊瑤道歉。

有傳兩人多年後終於肯認錯,係因為事件引起官方關注,並下令封殺有關。可惜咁都幫唔到幾多,于正宣佈退出綜藝節目《我就是演員3》,而郭敬明更加損失慘重,其改編自日本小說家夢枕獏作品《陰陽師》嘅電影《晴雅集》,用咗3億人仔拍攝,由趙又廷、鄧倫及香港金像影后春夏主演,上映10天票房收咗4億人民幣就被抽起,回本無望!

郭敬明以往電影《小時代》、《爵跡》等一向好壞參半,不過有大堆死忠fans撐場,再爛都收10幾億票房。《晴》有趙又廷及鄧倫等內地高人氣演員主演,應該都呃到票房,可惜落重本做特效美指,但唔肯用力創作,戲中多個場面似足漫威電影《奇異博士》!小說又抄、拍戲又抄,當啲觀眾讀者盲嘅咩?結果抄到觀眾都頂唔順罷睇,票房低開,依家成套戲抽起,連帶續集《瀧夜曲》都上映無期。

而家道歉都救唔返,抄襲抄到咁出面,點撐你呀?

更多電影文章

【電影LOL】2020香港電影票房急跌7成 《乜代宗師》《天能》成年度中西片票房冠軍

【電影LOL】Netflix正嘢History of Swear Words 眾星名正言順爆粗

【電影LOL】一文睇晒 13套改期2021年上畫大片

【電影LOL】《神奇女俠2:1984》逆市高收 《神奇女俠》鐵定拍第3集

【電影LOL】《色慾都市》Sex and the City復刻拍網劇版 索女會唔會變大媽?